“AzPolitika” xəbər verir ki, bu barədə vəkili Fəxrəddin Mehdiyev bildirib. Vəklin sözlərinə görə, C.Hacıyev saxlanma şəraitinə və müalicəsinə imkan verilməməsinə etiraz edir.

Vəkil dövlətin 100 milyonla vəsaitini taladığı üçün həbsə alınan C.Hacıyevin müxtəlif xəstəliklərdən əziyyət çəkdiyini və bu üzdən gündə bir neçə dərman qəbul etdiyini bildirir: “Məhbusların sayı artdığından, cəzaçəkmə müəssisəsində sıxlıq yaranıb, antisanitariya hökm sürür. Cahangir Hacıyevin Penitensiar Xidmətin Müalicə Müəssisəsinə köçürülməsi, yaxud heç olmasa, müəssisə daxilində tibbi-sanitariya hissəsinə yerləşdirilməsi üçün dəfələrlə müraciət etmişik. Müsbət cavab verilməyib”.

Bacısı Əminə Hacıyeva da keçmiş bankirin aclıq etdiyini iddia edib.

Ancaq Penitensiar Xidmət C.Hacıyevin aclığa başlaması, onun müalicə almaq hüququnun məhdudlaşdırılması barədə məlumatları təkzib edib: “Məlumat həqiqəti əks etdirmir. Müəssisədə digər məhkumlarla birlikdə cəza çəkir”.

Beynəlxalq Bankın İdarə Heyətinin sədri olmuş Cahangir Hacıyev 2015-ci ilin dekabrından həbsdədir.Ona ilk dəfə 2016-cı ildə Bakı Ağır Cinayətlər Məhkəməsinin hökmü ilə 5 il həbs cəzası kəsilib. Beynəlxalq Bankın 4.7 milyard vəsaitinin yeyintisində ittiham olunan C.Hacıyev ikinci dəfə 2019-cu ildə eyni ittihamlarla məhkum edilib. Bu dəfə onun cəzası 16 il 3 ayadək artırılıb.