Bunu Qaynarinfo-ya açıqlamasında neft-qaz mütəxəssisi İlham Şaban İqtisadiyyat naziri Mikayıl Cabbarovun Milli Məclisdə büdcə müzakirələri zamanı 2030-cu ilə qədər olan dövrü əhatə edəcək yeni strateji inkişaf proqramının qəbul ediləcəyi və hədəflərdən birinin neftdən asılılığın sıfıra endirilməsi olduğu barədə səsləndirdiyi fikrə münasibət bildirərkən deyib:

"Azərbaycanda hazırda 35 milyon ton neft və 30 milyard kubmetr qaz hasil olunur. 2030-cu ildə isə ölkədə təxminən 28-29 milyon ton neft və 35 milyard kubmetr qaz hasil olunacaq. Yəni belə baxanda neft hasilatında azalma o qədər də olmayacaq. Azərbaycan cari ildə 14 milyard dollarlıq neft ixracatından 6 milyard dollar, qaz hasilatından isə 550 milyon dollar civarında mənfəət götürəcək. 2030-cu ilə qədər olan dövrdə isə ölkəmizin neftdən gələn gəliri 4 milyard, qaz hasilatından gələn gəlir isə 3 milyard dollar olacaq. Birlikdə 7 milyard dollar. Hazırda qeyri-neft sektorunun həcmi 2 milyard dollardır. 2025-ci il üçün bu rəqəmi 2 dəfə artırmaq nəzərdə tutulub. Belədə, 2030-cu ilə qeyri-neft sektoru üzrə ümumi ixracın həcmi 6-7 milyard dollar civarına çata bilər”. 

 

Ekspert qeyd edir ki, Azərbaycanda qeyri-neft sektoru üzrə əlavə dəyər yarada, böyük dəyərdə xaricdə satıla biləcək heç nə yoxdur: 

"Qeyri-neft ixracından gələn mənfəət neftdən gələn mənfəətə bərabər olmalıdır ki, ikincidən asılılığın olmamasından danışasan. Deməli, neftlə qeyri-neft sektoru arasında 7 dəfəyə qədər fərq var. Bu halda, qeyri-neft sektoru nəyin hesabına artacaq? Azərbaycanda qeyri-neft sektoru üzrə əlavə dəyər yarada biləcək, böyük dəyərdə xaricdə satıla biləcək nəyimiz var? Bu baxımdan İqtisadiyyat nazirinin hansı prizmadan və hansı göstəricilərə əsaslanaraq, 2030-cu ildə neftdən asılılığın sıfıra endiriləcəyini söyləməsini deyə bilmərəm. 

2012-ci ildə hökumət "Azərbaycan 2020-ci il” proqramını qəbul etmişdi. Ona görə 2020-ci ildə ölkəmizdə adambaşına düşən gəlir 15 min dollar ətrafında olmalı idi. Ancaq cəmi 4 min dollar civarındadır. Ona görə də yaşayarıq, görərik”.