Bunu APA-ya açıqlamasında AMEA-nın prezidenti vəzifəsini icra edən akademik Arif Həşimov deyib.

Onun sözlərinə görə, hazırda AMEA-nın Ümumi yığıncağının nə vaxt keçiriləcəyi bəlli deyil.

Akademik bildirib ki, AMEA-nın prezidentinin seçilməsi məsələsi yeni Nizamnamədə əvvəlki ilə eyni cür əksini tapıb: “Müəyyən dəyişikliklərlə bağlı təkliflər var. Bu da nəzərə alınacaq. AMEA-nın prezidenti əvvəl olduğu kimi, yenə də Ümumi yığıncaqda seçiləcək. Ümumi yığıncağın səlahiyyətləri öz yerində qalır”.

Arif Həşimov qeyd edib ki, AMEA–nın yeni Nizamnaməsinin layihəsi Nazirlər Kabinetinə təqdim edilib: “Burada əməkdaşların sayı, yeni struktur və digər məsələlər öz əskini tapıb. Təsdiq edildikdən sonra ətraflı məlumat veriləcək. Yeni Nizamnamədə AMEA-nın hüquqi statusu da öz əksini tapıb”.

AMEA-nın Elm və Təhsil Nazirliyinin tabeliyinə verilən İnstitutlarına gəldikdə isə, akademik qeyd edib ki, bu proses ilin sonuna kimi yekunlaşacaq: “Nəzərə alaq ki, əməkdaşlar məzuniyyətdən qayıtdıqdan sonra işlər daha da sürətlənib. Əsas fəaliyyət sentyabrdan başlayıb”.