Musavat.com xəbər verir ki, Bakı Ağır Cinayətlər Məhkəməsində Sultanov Ehtiram Sanil oğlununun məhkəməsi keçirilib.

O, Cinayət Məcəlləsinin 181.2.5-ci (quldurluq - silah və ya silah qismində istifadə edilən əşyalar tətbiq edilməklə törədildikdə) maddəsi ilə ittiham edilir.

Hakim Əhməd Quliyevin sədrliyi ilə keçirilən məhkəmə iclasında şahid qismində polis əməkdaşı Ziya Həsənov ifadə verib.

O bildirib ki, "102 xidməti"nə verilən məlumatdan sonra Ehtiram Sultanovu saxlamaq üçün onun yaşadığı ünvana gediblər.

Polis əməkdaşı bildirib ki, həmin zaman Ehtiram Sultanov bıçaqla onlara hücum edərək müqavimət göstərib. Suallara cavab verən Ziya Həsənov əlavə edib ki, Ehtiramda iki bıçaq olub.

Ehtiram cibində ümumiyyətlə bıçaq olmadığını söyləyib.

Prosesin davamında zərərçəkmiş Əli Ovçuyev də ifadə verib. O, ziddiyyətli ifadələri ilə diqqət çəkib.

Əvvəlcə deyib ki, Ehtiram onun telefonunu istifadə məqsədi ilə alıb: "Dedi ki, qızla görüşə gedəcək. Buna görə də iki günlük telefonu istədi. Mən də verdim".

Suallara cavab verən Əli Ovçuyev sonra deyib ki, Ehtiramdan qorxduğu üçün telefonu ona verib. Onu da qeyd edib ki, Ehtiramın cibində bıçaq da görüb.

Məlum olub ki, Əli Ovçuyev hadisənin səhərisi qardaşını da götürərək Ehtiramın evinə gedib və telefonunu tələb edib.

Əli Ovçuyev ziddiyətli ifadələrini izah edə bilməyib. Məlum olub ki, o şikayətçi olmaq istəmir.

Qeyd edək ki, E.Sultanov müxtəlif vaxtlarda Cəfərov, Ovçuyev və Ağayev soyadlı şəxslərin qarşısını kəsərək onları soyuq silahla hədələyib, pul alıb və mobil telefonlarını alıb.