GoldNews.Az xəbər verir ki, Lotu Qulinin sifarişi ilə Şeyx Həmzətə qarşı sui-qəsd təşkil edilsə də, cəhd uğursuz alınıb. Nəticədə Həmzət Qastəmirov sol əlindən və qabırğasından yaralınıb. Bir müddət xəstəxanada müalicə alan avtoritet ayağa qalxıb və yaxın ətrafını başına toplayaraq qonaqlıq verib. Sözügedən mərasimdən fotolar isə sosial mediada yayılıb.

Xatırladaq ki, Şeyx Həmzətə qarşı sui-qəsd cəhdi ötən ay baş tutub. Şeyxin türk əsilli şəxsi cangüdəni bir neçə dəfə İstanbulda olub, Lotu Qulinin yaxın adamı ətrafında olan şəxslərlə görüşüb və onlara məlumatlar ötürürmüş. Hətta pul qarşılığında ona Şeyx Həmzəti aradan götürmək təklif edilib. O isə bununla razılaşıb və yaxın vaxtlarda Şeyxi aradan götürəcəyinə söz verib.

Bunu bilən Şeyx və yaxın adamları cəld tərpənərək cangüdənlərə tərəf gediblər. Cangüdənlərdən ikisi Şeyx və adamlarının gəldiyini görüblər və bundan şübhələnərək onlara atəş açaraq qaçmağa çalışıblar. Atəş nəticəsində Həmzət Qastəmirov sol əlindən və qabırğasından, yaxın adamlarından biri isə ayağından güllə yarası alıb. Onlar Berlin şəhərindəki xəstəxanalardan birinə yerləşdiriliblər. Cangüdənlərdən biri isə qaçmağa macal tapmayıb və ələ keçirilib.