Azərbaycanda 2 pasiyenti cərrahiyyə masasında dünyasını dəyişən Sirus Qoçqani Səhiyyə Nazirliyi Elmi-Təhqiqat Ağciyər Xəstəlikləri İnstitutunun ginekoloqu Sona Gürgün Vəliyevanın ölümü ilə bağlı olduqca ciddi etiraf edib. Sirus Qoçqaninin etirafı onun pasiyentinə əməliyyatdan əvvəl yalan danışmasını ortaya qoyur.

Sona Vəliyeva Gürgünün ailəsinin nümayəndəsi, ictimai vəkil Samir Zeynalov bununla bağlı redaksiyamıza məlumat verib. Deyib ki, Sirus Qoçqani onunla yazışmasında Sona Gürgün Vəliyevanı aldatmasını, onu faktiki olaraq bu yolla əməliyyata razı saldığını qeyd edir.

İctimai vəkil “Yeni Müsavat”a açıqlamasında qeyd edir ki, bununla belə, “Baku Medical Plaza”nın plastik-estetik cərrahı Sirus Qocqani israrla bildirir ki, onun liposaksiya əməliyyatları üçün istifadə etdiyi aparat “piy emboliyası” vermir: “Hər kəsin bildiyi kimi, liposaksiya əməliyyatlarının əməliyyatı keçirən şəxs üçün başlıca risk göstəricisi məhz piy emboliyasının baş verməsi aktıdır. Mərhumə Sona Vəliyeva Gürgünün ölümünə dair ”Baku Medikal Plaza"da tərtib edilən epikrizdə və əldə edilən ölüm şəhadətnaməsində ölüm səbəbi kimi kəskin ürək-ağciyər çatışmazlığı və ağciyər arteriyasının piy emboliyası göstərilib. Belə olan halda suallar yaranır. Əgər Sona xanımın vəfatına səbəb piy emboliyasının yaranması aktıdırsa, onda necə olub ki, həkimin vədinə əsasən emboliya verməyən aparat bu neqativ aktın gerçəkləşməsinə səbəb olub?