AzFakt

“Azəraqrar”ın əsl rəhbəri kimdir? - Nazirin sabiq komandirinin maaşı 7 dəfə artırılıb?

Bizim iradəmizə qarşı çıxanın başı əziləcək - Azərbaycan Prezidenti

Maliyyə Nazirliyi AAYDA yoxlama aparır - Ciddi yeyintilər aşkarlanıb

Vensin Azərbaycana səfəri: Zəngəzur dəhlizinin müzakirələri yeni mərhələdə

Sovet təhsil elitası və cavabsız qalan suallar:Rektor 6 il sonra universitetə necə daxil olub?

Binəqədi rayonunda neft buruqları ərazisində daha bir qanunsuz tikinti - FOTO/VİDEO

Anar Əlizadə-Mübariz Mənsimov qarşıdurması - Kompromat savaşı yenidən başlayıb

Eldar Əzizovun narazı olduğu kadr: Xalid Ələkbərov yola salınır...

Sahib Məmmədovun “mənbə” axtarışı qalmaqal yaratdı - İşçilərin otağından dinləyici qurğu tapılıb

Eyyubov və digər vəzifəli şəxslərin əməlləri açıqlandı - Baş Prokurorluq məlumat yaydı

“Bravo”nun sönükən fəaliyyəti - Marketlər şəbəkəsinin rəqabətə davamlılığı niyə hər gün zəifləyir?

Yaponiya-Çin gərginliyi pik həddə: Qarşılıqlı hədələr durmadan artır

Anar Əlizadə SOCAR-a və “Alkagesta” şirkətlərinə qarşı “qara PR” aparıb - İLGİNC İDDİA

Saleh Məmmədovun işçisindən 20 min dollarlıq toy hədiyyəsi - AAYDA sədrini hədəfə gətirdi

“Müsavat Partiyası mədəni-kütləvi tədbirlər dərnəyinə çevrilib“ - Yadigar Sadıqlı


Tarix 01.08.19, 20:00	Font ölçüsü : - / +

Müsavat Partiyasında rəhbərliyin xaricə gedən və partiya üzvü olmayan şəxslərə partiya üzvü olması barədə arayışlar verməsi ilə əlaqədar qalmaqal yaşanır. Partiyanın Məclis üzvü Könül Şamilqızı və partiya üzvü Yafəs Həsənovun bu barədə sosial şəbəkələrdəki səhifələrində geniş yazıblar və Divan üzvü, qarşıdakı qurultayda başqanlığa namizəd Yadigar Sadıqlı da daxil olmaqla, bir sıra partiya üzvləri də onların mövqeyini dəstəkləyib. İyulun 31-də Müsavat Partiyasının növbədənkənar Divanı partiya rəhbərliyini və partiya üzvlərini nüfuzdan salan publik (ictimai) müzakirələrə son qoyulması, partiyadaxili müzakirələrin ictimailəşdirilməsinin partiyanın nüfuzuna xələl gətirdiyi və Müsavata qarşı olan qüvvələrin bu açıqlamalardan partiyaya qarşı istifadə etdiyi üçün belə halların yolverilməz olduğunun partiya üzvləri Yafəs Həsənovun, Könül Şamilqızının, Nemət Kərimlinin, Yadigar Sadıqlının diqqətinə çatdırılması barədə qərar qəbul edib.

Y. Sadıqlı sosial şəbəkədəki səhifəsində Divanın qərarını Nizamnaməyə zidd saysa da, Müsavat Partiyasının Mərkəzi İcra Aparatının rəhbəri Gülağa Aslanlı APA-ya açıqlamasında deyib ki, Divanın qərar partiyası cəzası kimi nəzərdə tutulmayıb və bunu Nizamnamə ilə əsaslandırmağa da ehtiyac yoxdur. G. Aslanlı bildirib ki, Divan bu qərarı ilə həmin şəxslərə xəbərdarlıq edib ki, belə şeylərə ehtiyac yoxdur, bunu yığışdırsınlar. Müsavat Partiyasının Mərkəzi İcra Aparatının rəhbəri həmin şəxslərin yenə bu yöndə açıqlamalarını davam etdirərsə, bununla bağlı Nizamnamə çərçivəsində tədbir görülə biləcəyini də söyləyib. Yadigar Sadıqlı isə APA-ya müsahibəsində Divanın qərarının bir xəbərdarlıq, eyham xarakteri daşıdığını bildirib.

- Divanın iclasında nə üçün iştirak etməmisiniz?

- Divanın belə bir iclasının keçiriləcəyi barədə günortadan sonradan Divan üzvlərinə məlumat verilib. Həmin məlumatda da yazılmışdı ki, Azad Həsənovun aclıq aksiyası, Elman Quliyevin həbsi və bəzi partiyadaxili məsələlər müzakirə olunacaq. Konkret mənimlə bağlı məsələnin müzakirə olunacağı mənə bildirilməyib. Mən Lənkəranda idim, şəxsi işlərim də vardı. Digər tərəfdən, Divan tətilə buraxılmışdı. Bildirilmişdi ki, yaxın həftələrdə Divanın iclası olmayacaq. Bu, Divanın növbədənkənar iclasıdır. Adətən, Divanın iclasları bazar ertəsi olur. Mən də qeyri-adi bir şey görmədiyim üçün bu istidə tələsik Lənkərandan Bakıya getmədim. Bu məsələ müzakirə olunduğu, qərar qəbul edildiyi zaman Lənkəranda olmuşam.

- Bu qərarı necə qiymətləndirirsiniz?

- Müsavat Partiyasının Nizamnaməsində partiya rəhbərliyini, partiya strukturlarını, partiyanın yürütdüyü siyasəti tənqid etməklə bağlı azadlıqlar əksini tapıb. Nizamnamədə qeyd edilib ki, təhqir, böhtan yoxdursa, partiya üzvü heç vaxt buna görə intizam məsuliyyətinə cəlb oluna bilməz. Belə olan halda dünən qəbul edilən qərar Müsavat Partiyasının Nizamnaməsinə tamamilə ziddir. Bu, Müsavat Partiyasında son 5 ildə söz azadlığının, plüralizmin boğulmasına qarşı Arif Hacılının yürütdüyü siyasətin növbəti nəticəsidir. Partiyada yürüdülən hazırkı siyasətə alternativ siyasət təqdim edən insanların səsini boğmağa hesablanıb. Müsavat Partiyası əvvəllər Azərbaycanda ən demokratik, ən plüralist təşkilat idi. Son zamanlar bunun əksini müşahidə edirik. Partiyanın hazırkı durumundan narazı olan və tənqidlər səsləndirən üzvlərin tənqid imkanlarının boğulması prosesi aparılır. Dünən qəbul olunan qərarın da Nizamnaməyə zidd olduğu heç kəsdə şübhə doğurmur. Hətta ilk dəfə Müsavat Partiyasının Nizamnaməsindəki həmin müddəa ilə tanış olan insanlara da aydın olur ki, dünən qəbul olunan qərar Nizamnaməyə ziddir. Məqsəd narazıların səsini boğmaq, qurultay öncəsi “partiyadan qovula bilərlər” təhlükəsi yaratmaq cəhdidir. Aydın məsələdir ki, Müsavat Partiyasının üzvü olan insanlar üçün partiya həddindən artıq əziz, həddindən artıq qiymətlidir. İnsanlar ömürlərini, karyeralarını, sağlamlıqlarını bu partiyaya sərf ediblər, bu partiyadan kənarda həyatlarını təsəvvür etmirlər. Bu da bu haldan sui-istifadə cəhdidir. Yəni “səhviniz”i dayandırmasanız, haqqınızda intizam tədbirləri görülə bilər.

- Xəbərdarlığın səbəbi kimi göstərilən məsələyə münasibətiniz necədir?

- Düzü, anlaya bilmirəm. Qərarda Müsavat Partiyasından xaricə gedənlərə arayış verilməsi məsələsi ilə əlaqədar Yafəs Həsənovun adı çəkilir. Açığı, mənim səsləndirdiyim tənqidlər partiyanın Nizamnaməsinin mənə verdiyi hüquqlardan heç də kənara çıxmır. Mən belə reaksiyanın siyasi cəhətdən heç bir əsası olmadığını fikirləşirəm. Bu, sadəcə, demokratik olmayan zehniyyətin təzahürüdür. Bunun başqa bir əsası yoxdur. Niyə mənim səsləndirdiyim tənqidlərdən bu qədər narahat olublar? Arif Hacılı partiyanın başqanıdır. Partiyada, yaxud başqa yerdə hakimiyyətdə olanın əlində istər-istəməz administrativ resurs olur. Bu insanlar dəyişikliklərdə deyil, daha çox status-kvonun davam etməsində maraqlı olurlar. Arif Hacılının hazırda mənim namizədliyimə qarşı belə administrativ bir üstünlüyü var. Bunun müqabilində mənim başqanlığa namizədliyimdən niyə belə narahat olduqlarını anlaya bilmirəm. Bu mənim namizədliyimə qarşı administrativ resursdan istifadədən başqa bir şey deyil. Əslində həmin qərar daha çox məni dəstəkləyəcək, müdafiə edəcək şəxsləri çəkindirməyə hesablanıb. Mən heç zaman Müsavat Partiyasını nüfuzdan salan hərəkətlər etməmişəm. Əksinə, qürur və fəxrlə deyə bilərəm ki, Müsavata ən çox nüfuz qazandıran şəxslərdən biri olmuşam. Bir çox halda da əsəbimi, enerjimi hökumətlə yanaşı partiyanı nüfuzdan salan üzvlərə qarşı xərcləmişəm.

- Qərarın səbəbi kimi ortaya çıxan, xaricə gedən partiya üzvü olan, yaxud olmayan şəxslərə arayış verilməsi məsələsi nə dərəcədə ciddi məsələdir?

- Mən də inanmaq istəmirəm ki, Arif Hacılı və digər partiya yoldaşlarım arayış məsələsindən hansısa kirli məqsədlər üçün istifadə etsinlər. Sadəcə, bu məsələ partiya ətrafında qalmaqal yaradırsa, partiyanın nüfuzuna ziyan vurursa, o zaman bu məsələnin ictimaiyyət nümayəndələrinin, yaxud bizim iştirakımızla şəffaf şəkildə araşdırılması mümkün ola bilərdi. Heç bir sui-istifadəyə yol verilməməsi üçün şəffaf şəkildə faktların ortaya çıxarılması yaxşı olardı. Təəssüf ki, bu məsələ araşdırılmayıb. Mən də bu məsələdən təxminən partiya üzvü olmayan insanlar qədər uzağam, məlumatlarım həddindən artıq məhduddur. Hamının bildiyi şəxslərdən başqa, 197 nəfər kimdir, kimə arayış verilib, mənim də məlumatım yoxdur. Biz də dəfələrlə müəyyən addımlar təklif etmişik ki, Müsavat Partiyasının adı bu qalmaqalda hallanmasın, partiyaya bundan ziyan gəlməsin. O cümlədən müəyyən müddət ərzində bu arayışların verilməsinin durdurulmasını da istəmişik. Təəssüf ki, təkliflərimiz həyata keçməyib, bu gün yenə də Müsavat Partiyasının ətrafında bu xoşagəlməz söz-söhbətlər davam edir.

- Son illərinə təcrübəsində Müsavat Partiyasında başqanlığa namizədləri son nəticədə partiyadan çıxarılmış, uzaqlaşdırılmış görmüşük. Özünüzə qarşı bu addımı gözləmirsiniz ki?

- Dünənki qərarı bir işarə, eyham kimi də başa düşmək olar. Lakin tam səmimi sözümdür, qurultayqabağı müsavatçıların səsi üçün demirəm. Mən özümü tamamilə, iliyimə qədər müsavatçı hesab edirəm. Özümü Müsavat Partiyasından kənarda təsəvvür etmirəm. Müsavat Partiyasından getmək fikrim də yoxdur. İstənilən halda Müsavat Partiyasında qalıb öz mübarizəmi davam etdirmək üçün çalışacağam. Əgər onlar məni partiyadan hansısa bəhanə ilə çıxararlarsa, məni partiya üzvlüyündən çıxarmaq mümkün olsa da, mənim müsavatçılığımı əlimdən almaq olmaz, əqidəmi şüurumdan silmək olmaz.

- Qurultaya qədər partiyada qalsanız, şansınızı necə qiymətləndirirsiniz?

- Administrativ resurs Arif Hacılını daha şanslı edir. 2014-cü ildə başqan dəyişikliyinin Müsavat Partiyasında yaratdığı təbəddülat Arif Hacılının xeyrinə işləyir. Çünki müsavatçılar yenə də dəyişiklik olacağı təqdirdə belə halların yaşanacağından çəkinirlər. Bu hallar Arif Hacılını daha şanslı göstərir. Amma düşünürəm ki, bizim təkliflər, strategiyalar, siyasət, xətt və hərəkət Müsavat Partiyasının üzvlərinin ürəyincə olacaq və səsimizi toplaya biləcəyik. Burada əsas məsələ nədən ibarətdir? Əslində məsələ sırf Yadigar Sadıqlının başqan seçilməsi deyil. Söhbət Müsavat Partiyasının yenilənməsi, formatlanması, daha çevik, daha prinsipial, daha ardıcıl siyasət yürütməsindən gedir. Biz bu siyasəti təklif edirik. Əgər müsavatçılar bu xətti seçəcəklərsə, bu, bizim hamımızın qələbəsi olacaq. Amma müsavatçılar indiki kimi həddindən artıq ətalətlə idarə olunan üsul-idarəni seçəcəklərsə, Müsavat Partiyasının mədəni-kütləvi tədbirlər dərnəyinə çevrilməsini müdafiə edəcəklərsə, bu da onların seçimi olacaq.

Xəbərin oxunma sayı : 334