Fanat.Az-ın əldə etdiyi məlumata görə, yayda fransalı Romen Baskı heyətinə qatan "ağ-qaralar" bu futbolçunun ümidləri doğrultmaması üzündən yeni variantları nəzərdən keçirir.

Son çempionun əsas hədəfi isə "Keşlə"nin və Azərbaycan millisinin üzvü Azər Salahlıdır. Mövsümün sonunda indiki klubu ilə olan müqaviləsinin müddəti başa çatacaq Azərin azad agent statusu ilə heyətə qatılması planlaşdırılır. Tərəflər indilik müqavilənin şərtlərini müzakirə etməsələr də, futbolçunun özünün də "xalq komandası"nın planından xəbəri var və o, şəxsən ağ-qara formanı geyinməkdə maraqlıdır.

Bakılılar eyni zamanda "Qəbələ"nin 27 yaşlı mərkəz müdafiəçisi Ruan Renatonu da diqqətdə saxlayır. Yayda "qırmızı-qaralar"la 1+1 illik anlaşma imzalayan Renatonun sərgilədiyi futbol baş məşqçi Samir Abasovun və rəhbərliyin ürəyincədir.

Flaqman yarımmüdafiə xəttini də gücləndirməkdə qərarlıdır. "Sabah"ın və yığmamızın futbolçusu Aleksey İsayev mövcud çatışmazlıqların qaydaya salınması baxımından ən yaxşı seçim hesab edilir. 2020-ci ilin yayında Masazır təmsilçisi ilə 3 illik müqavilə bağlayan İsayevi indiki iş yerindən "qoparmağın" planları cızılır.