Translyasiya hətta “Tvitter”dən canlı yayımlanıb.

N.Maduro onu prezident olaraq qəbul etməyən parlamentdə deyil, Ali Məhkəmədə and içib.

İnauqurasiyada Amerika qitəsindən sadəcə Boliviya, Kuba, Nikaraqua, Salvador və Gürcüstanın işğal olunmuş torpaqlarında Rusiya tərəfindən yaradılan oyuncaq “Cənubi Osetiya Respublikası”nın “prezidenti” iştirak edib. Rusiyanın özünü Federasiya Şurasının sədri İlyas Umaxanov təmsil edib.

Lakin Maduronun legitimliyi dünyanın azad və demokratik sayılan ölkələri tərəfindən qəbul edilmir. Bununla bağlı “Lima qrupu” deyilən Latın Amerikası ölkələri xüsusi bəyanat veriblər. Bu qrupa qitənin ABŞ-dan sonra ən qüdrətli dövlətləri, o cümlədən Braziliya, Argentina, Kanada, Kolumbiya, Paraqvay, Çili , Honduras və s. daxildir.

Amerika Dövlətləri Təşkilatı da Maduronu prezident kimi tanımayıb. Qurumun daimi şurası Nikolas Maduronun legitimlik məsələsi ilə razılaşmadığını açıqlayıb.

Paraqvay dövləti Venesuela ilə diplomatik münasibətlərini kəsib. Kolumbiyanın vitse-prezidenti Marta Lusiya Ramirez isə ölkənin “Noticias Caracol” qəzetinə verdiyi müsahibədə hətta Venesuelanı Kolumbiyanın milli təhlükəsizliyi üüçn böyük təhdid adlandırıb.

Vitse-prezident “Tvitter” hesabında bütün dünyanı “Venesuelanın diktatoruluğundan çıxması və demokratiyanın bərpası üçün Tanrıya yalvarmağa” çağırıb.

ABŞ isə inauqurasiyanı hakimiyyətin qəsbi prosesinin davamı adlandıraraq, korrupsiyada, insan haqlarının kütləvi şəkildə pozulmasında və demokratiyanın məhvində iştirak edən bütün hökumət üzvlərinə qarşı sərt sanksiyalar tətbiq edib.

Musavat.com