“Report”un məlumatına görə, Qəbələ şəhər stadionunda eyniadlı komanda “Səbail”i qəbul edib.

Baş hakim İnqilab Məmmədovun idarə etdiyi qarşılaşma meydan sahiblərinin qələbəsi ilə yekunlaşıb – 2:1.

İlk yarıda tərəflərdən heç biri qol vura bilməyib. Fasilədən sonra “qırmızı-qaralar” sürətli qollarla istəklərinə çatıblar. Ceyms Adeniyi 49 və 55-ci dəqiqələrdə çoxgedişli kombinasiyaları dəqiq zərbələrlə tamamlayıb. Bununla da nigeriyalı yarımmüdafiəçi aktivindəki qolların sayını 10-a çatdıraraq, bombardirlər siyahısında liderliyə yüksəlib.

73-cü dəqiqədə isə “Qəbələ” azlıqda qalıb. Bəhlul Mustafazadə ikinci sarı vərəqəni alaraq, meydandan kənarlaşdırılıb. “Səbail” say üstünlüyündən təsəlli qolunu vurmaqla yararlanıb. 84-cü dəqiqədə künc zərbəsindən sonra yeni transfer Elvin Yunuszadə başla topu tora göndərib.

Bu qələbə sayəsində xallarını 28-ə çatdıran “Qəbələ” 3-cü pillədəki “Səbail”lə xal fərqini 3-ə endirib.

Qeyd edək ki, turun açılış oyununda “Keşlə” “Sabah”ı darmadağın edib – 3:0. “Qarabağ” – “Zirə” matçı isə qolsuz yekunlaşıb. Tura bu gün saat 16:30-da başlanacaq “Sumqayıt” – “Neftçi” matçı ilə yekun vurulacaq.