Bərdənin Sənaye küçəsinin sakinləri su sarıdan əziyyət çəkirlər. 

``Yeni Məhəllə`` adlandırılan ərazidə yaşayanlar deyirlər ki, belə vəziyyət illərdir ki, davam edir. 

Sakinlərin sözlərinə görə məişətdə quyu suyundan istifadə edirlər. Lakin quraqlıqla əlaqədar quyular quruduğundan su tapmaq müşkülə çevrilib. 

Sakinlər deyirlər ki, məcbur olub içməli suyu pulla alırlar. Bu isə sərfəli deyil. 

Məsələ ilə bağlı Bərdə Rayon icra hakimiyyətindən bildirilib ki, yeni salınmış məhəllədə içməli su ilə bağlı təchizatda problemlər var. Bununla bağlı rayon rəhbərliyi tərəfindən aidiyyəti dövlət qurumlarına müraciət edilib. ``Yaxın gələcəkdə Bərdə şəhərinin içməli su və kanalizasiya xəttinin yenilənməsi gözlənilir. Sözügedən ərazi də həmin layihəyə salınıb``-deyə qurumdan əlavə edilib.