AzFakt.com xəbər verir ki, "AzPolitika.info”nun məlumatına görə, araşdırmaçı jurnalist Cavanşir Həsənli sabiq bank prezidentinin xaricdə bəzi maliyyə əməliyyatlarını həyata keçirdiyi şirkətlə bağlı sənədləri əldə edib. Söhbət Cahangir Hacıyevin Londondakı BERKELEY BUSINESS LIMITED şirkətindən   gedir.

Jurnalistin yaydığı sənədlərdən belə məlum olur ki, Beynəlxalq Bankın keçmiş prezidenti arvadı Zamirə Hacıyeva üçün "Gulfstream Aerospace” korporasiyasından 2013-ci ildə 42,5 milyon dollarlıq "Gulfstream G550″ təyyarəsini bu şirkət üzərindən sifariş edib.

"Müqaviləni BERKELEY BUSINESS LIMITED adından şirkətin hazırda Fransada yaşayan azərbaycanlı keçmiş direktoru Fərhad Rəhimov imzalayıb. O hazırda Fransada daşınmaz əmlak şirkətinin sahibidir.

Cənab Rəhimovla bu müqavilə ilə bağlı əlaqə saxlamışam. Deyir ki, o sadəcə şirkətin icraçı direktoru kimi müqaviləyə imza atıb”-deyə jurnalist yazıb.

Müəllif sənədlərə istinadən yazır ki, "Gulfstream G550″ təyyarəsinin sifarişi və pulun ödənişdən sonra, yəni 2016-cı ildə şirkətin 34.297.494 funt sterlinq (təxminən 75 milyon manat) aktivləri olub:

"Fərhad Rəhimov bir müddət Zamirə Hacıyevaya məxsus Mill Ride Golf Club-un direktoru vəzifəsini də icra edib. Zamirə Hacıyevaya məxsus MRGC 2013 LTD şirkəti (Qolf klubun idarəçiliyini həyata keçirir) hələ də aktivdir və hazırda icraçı direktoru rus əsilli İngiltərə vətəndaşı Marina POLIUKHOVA-dır. Yəni dəyirman öz işindədir… Kimlərsə də Cahangirdən, Zamirədən məzlum obrazı düzəltməyə çalışırlar” - C.Həsənli yazıb.