“Report”un xəbərinə görə, bunu həmin ölkələrin, o cümlədən ada dövlətlərinin, muxtar regionlarının koronavirusa yoluxma statistikaları sübut edir.

Araşdırmalarımız zamanı məlum oldu ki, bəzi kiçik ölkələrdə, o cümlədən ada dövlətlərdə, habelə muxtar regionlarda koronavirusa cəmi bir neçə yoluxma qeydə alınıb, ölüm halı aşkarlanmayıb.

Məsələn, Atlantik okeanının cənubunda yeləşən Müqəddəs Yelena adasında 2019-cu ilin sonlarından bu günə kimi COVID-19-a cəmi 2 nəfər yoluxub, ölən olmayıb.

Sakit okeanın cənubunda, Britaniya Birliyinin tərkibində müstəqil ada dövlət Tuvaluda isə koronavirusa cəmi 8 nəfər yoluxub, onların hamısı sağalıb, ölüm halı qeydə alınmayıb.

İtaliyanın paytaxtı Roma ilə əhatə olunmuş şəhər dövlət Vatikanda cəmi 29 nəfərdə COVID-19 aşkarlanıb, ölüm halı qeydə alınmayıb (Yeri gəlmişkən, İtaliyanın özündə koronavirusa 21 170 600 yoluxma aşkarlanıb, 172 568 nəfər ölüb).

Sakit Okeanın mərkəzi hissəsində, Havayla pandemiyanın tüğyan etdiyi Filippin (3 785 869 yoluxma, 60 762 ölüm halı) arasındakı Marşal adalarını (59,1 min nəfər əhali) pandemiyadan kənarda qalan xoşbəxt yer hesab etmək olar. Üç ilə yaxın davam edən pandemiya dövründə burada koronavirusa cəmi 66 nəfər yoluxub, ölüm halı qeydə alınmayıb.

Bir zamanlar Argentina ilə Böyük Britaniya arasında mübahisəli əraziyə çevrilmiş, hətta hərbi qarşıdurma subyekti olmuş Folklend adalarında son 2 il ərzində ümumilikdə 1 835 nəfər COVID-19-a yoluxub. Son vaxtlar koronavirusa yoluxma qeydə alınmayıb.

Çinin cənub sahilində yerləşən muxtar region olan Makaoda (649,3 min əhali) iki ildən artıq müddətdə koronavirusa 791 nəfər yoluxub.

Qeyd edək ki, koronavirus 2019-cu ilin dekabrında Çinin Uhan şəhərində yayılmağa başlayıb. Ümumdünya Səhiyyə Təşkilatı (ÜST) 2020-ci ilin fevralın 11-də infeksiyanın adını COVID-19 qoyub, martın 11-də isə koronavirusu pandemiya elan edib.