Suriya prezidenti Bəşər Əsəd rejiminə dəstək məqsədilə bu ölkəyə göndərilən “Sepah”ın muzdlu əfqanlardan ibarət “Fatimiyyun” briqadasının 3 üzvü (Məhəmmədhüseyn Heydəri, Ruhullah Hüseyni və Hüseyn Rəhmani) bir neçə həftə əvvəl Suriyanın Şeyx Səid məntəqəsində əsir düşsələr də, sonradan onların meyitləri tapılıb.

Həmçinin Suriyaya göndərilən “Sepah”ın bir iranlı muzdlusu (Hüseyn Moiz Qulami) martın 24-də bu ölkənin Hemah əyalətində müxaliflər tərəfindən öldürülüb. Hər dörd “Sepah”çının cənazələri martın 28-də İranın Kirman şəhərinin hava limanına gətirilib. Həmin gün, cənazələr İranın Bərdsir, Rəfsəncan və Tehran şəhərlərinə aparılıb və həmin şəhərlərdə torpağa tapşırılıb.

İran, Bəşər Əsəd rejiminin əsas himayədarlarından biri sayılır. Son illər Suriya hökumətinə yardım məqsədilə bu ölkəyə göndərilən minlərlə “Sepah”çı, Əsədə müxalif qüvvələrin əli ilə öldürülüb. Həlak olanların əksəriyyətini isə İranda qaçqın həyatı yaşayan “Sepah”ın Əfqanıstan və Pakistan vətəndaşlarından ibarət “Fatimiyyun” və “Zeynəbiyyun” briqadalarının muzdluları təşkil edir. /GünAzTV