30 oktyabr tarixində ipoteka kreditləri ilə bağlı Milli Məclisdə dəyişikliklər müzakirə olmuşdu. Buna uyğun olaraq da Prezident ötən gün dəyişiklikləri təsdiqləmək üçün fərman imzaladı.

Bu sözləri Axar.az-a açıqlamasında Prezident İlham Əliyev “İpoteka haqqında” Azərbaycan Respublikasının Qanununda dəyişiklik edilməsi barədə fərmanını şərh edən iqtisadçı Natiq Cəfərli deyib. O bildirib ki, həmin dəyişikliklər artıq qüvvəyə mindi:

“Burada müraciətlərin elektronlaşması, müraciətlərə daha operativ baxılması və daha ədalətli qərarların verilməsi ilə bağlı təkmilləşdirilmiş təkliflər var. Bununla ipoteka müraciətlərinə daha tez və doğru baxılacaq. Əsasən də sosial ipoteka ilə bağlı dəyişikliklərdə elektron formada ərizələrin, müraciətlərin qəbul olunması məsələsi önə çəkilib”.

İqtisadçı qeyd edib ki, bu dəyişiklik müraciətlərin sürətlənməsi, daha ədalətli baxılması, banklar tərəfindən daha sürətli və çevik qərarların verilməsi, ümumilikdə bütün prosesin elektronlaşması yönündə mühüm məqamdır:

“Yəni işlərin sürətlənməsi nöqteyi-nəzərindən irəliyə atılmış addımdır”.

Qeyd edək ki, dünən Prezident İlham Əliyev “İpoteka haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2018-ci il 30 oktyabr tarixli 1298-VQD nömrəli Qanununun tətbiqi və “İpoteka haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2005-ci il 7 iyun tarixli 252 nömrəli Fərmanında dəyişiklik edilməsi haqqında fərman imzalayıb.