Hüquq-mühafizə orqanlarından virtualaz.org-a məlum olub ki, Gəncədə iyulun 3-də baş vermiş terror aktında iştirakda ittiham edilən daha bir nəfər həbs olunub. Bu, 1966-cı il təvəllüdülü Akif Əliyevdir.

Gəncədə iyulun 10-da törədilmiş cinayətlərin daha iki aktiv iştirakçısı da həbs edilib. Həbs olunanlar Gəncə sakini Seymur Əliyev (1993) və Göranboy rayon sakini Elman Rüstəmovdur (1997).

Həmçinin mətbuatda bilə-bilə yalan məlumat yayan daha 2 saytın –“gununsesi.info” və “teref.info”nun vəzifəli şəxsləri barəsində Baş Prokurorluqda cinayət işləri başlanıb. Hüquq mühafizə orqanları tərəfindən bir daha bəyan edilir ki, həmin hadisələrlə əlaqəsi olan heç kəs məsuliyyətdən kənarda qalmayacaq, bütün təqsirli şəxslər barəsində ən ciddi tədbirlərinin görülməsi təmin ediləcək.

Bundan başqa, Gəncə hadisələrində iştirakda şübhəli bilinən 4 şəxs Azərbaycan-Rusiya sərhədini Qusar rayonu ərazisindən, 1 nəfər isə Azərbaycan-Gürcüstan sərhədinin Qazax rayonu ərazisindən keçmək istərkən saxlanılıblar.