Elə Qasımovun vəkili Mərdəli Süleymanov da bu hökmün qanunsuz olduğunu, iş adamının sifarişlə həbs olunduğunu bildirir. O, bununla bağlı Prezidenti cənab İlham Əliyevə müraciət ünvanlayıb. Müracətin surəti Baş prokuror Zakir Qaralova, Ədliyyə naziri Fikrət Məmmədova və Prezident Administrasiyasının Hüquq-mühafizə orqanları ilə iş Şöbəsinin müdiri Fuad Ələsgərova da göndərilib.

Bir nüsxəsi də “AzPolitika.info”ya da daxil olan müraciətdə vəkil “Real MTK”-nın həbsdə olan keçmiş təsisçisi İlham Qasımovun günahsız olduğunu qeyd etməklə yanaşı, məhkəmə prosesi zamanı yol verilən qanunsuzluqları da açıqlayıb.

Müraciətdə ilk növbədə İlham Qasımovun günahsız həbsə alınmasına diqqət yetirilərək qeyd olunur: “Hörmətli Prezident! İş adamı İlham Səfəralı oğlu Qasımovun qeyri-qanuni, məmur sifarişi ilə həbs edilməsilə bağlı bütün dövlət orqanlarına ailə üzvləri tərəfindən ünvanlanmış müraciətlər nəticəsiz qalmışdır. Görünür bəzi dövlət orqanlarının rəhbərləri üçün insan həyatı heç bir əhəmiyyət kəsb etmir. Bu üzdən də Sizə müraciət edərək, kömək istəmək məcburiyyətində qaldıq.

Müvəkkilim İlham Qasımov 20 iyun 2016-cı ildə heç bir şirkətdə rəhbər vəzifə tutmadığı halda Binəqədi rayon Məhkəməsinin qərarı ilə həbs olunub. Hansı ki, həbs olunmazdan əvvəl həmin işə Binəqədi rayon Məhkəməsində mülki iddia kimi baxılıb. Belə şıxır ki, Binəqədi rayon Məhkəməsinin hakimi Fərrux Qasımov qanunvericilikdə mülki işlə cinayət işi arasındakı fərqi bilmir.

Halbuki müvəkkilim İlham Qasımov 2014-cü ildən bu günə kimi, dövlət strukturları tərəfindən səlahiyyətli və vəzifəli şəxs kimi tanınmır. Şikayət edən, Rusiyada azərbaycanlı milyonçu kimi tanınan Gülağa Qəmbərov isə müvəkkilim İlham Qasımovla ortaq olublar. Bu ortaqlığa vəsilə olan onların digər biznes şəriki, Respublika Baş Prokurorluğunun Təşkilat-Analitik İdarəsinin rəisi general Müqəddəs Sultanovdur.

İttiham aktında cinayət işinin başlanmasının səbəbi kimi göstərilir ki, guya İlham Qasımov “Real MTK”-nın vaxtı ilə həmtəsisçisi olduğu zaman Gülağa Qəmbərov adlı şəxslə qarşılıqlı fəaliyyət haqqında Bakı şəhəri Yusifbəyli küçəsi 39-41 ünvanında yerləşən ərazidə 25 mərtəbəli ev tikmək barədə müqavilə imzalayıblar. Guya G.Qəmbərov həmin tikintinin aparılması üçün İ.Qasımova nağd formada pul ödəyib. İ.Qasımov isə guya heç bir tikinti işi aparmadan həmin pulları mənimsəyib.

Ancaq G.Qəmbərovun verdiyi pulların hamısı sözügedən tikinti ücün təyinatı üzrə xərclənib. Sual olunur: əgər doğrudan da işdə cinayət tərkibi vardısa, niyə ortaqlar arasında daxili müqavilələr bağlanırdı?

İkinci tərəfdən, Yusifbəyli küçəsindəki torpaq ərazisi “Real MTK” tərəfindən tikinti aparılması üçün müqavilə əsasında “Odlar Yurdu” MTK-ya verilmişdir. Hansı ki, bu MTK-da Müqəddəs Sultanov və Gülaga Tənha şərikdirlər. Müqəddəs Sultanov “Odlar Yurdu” MTK-dakı payını baldızı Nəzakət Əliyevanın adına sənədləşdirib. Həmin MTK-da İlham Qasımovun və ailəsinin də payı var. “Odlar Yurdu” MTK-nın adından Qasımovlar və digər şəxslərə verilən onlarla maliyyə borc arayışı da bunu təsdiqləyir (Bu arayışlardan bəzilərinin fotosurətləri yazıya əlavə olunur-red). Elə Müqəddəs Sultanovun İlham Qasımovu həbs etdirməkdə də əsas məqsədi onun və ailəsinin MTK-dakı payını ələ keçirməkdir. Bununla əlaqədar müvəkkilimin ailəsi Müqəddəs Sultanovun onlara müəyyən sifarişlər göndərdiyini də bildirir. Müqəddəs Sultanov müvəkkilimin ailəsinə sifariş göndərərək, bildirib ki, “Odlar Yurdu” MTK-dakı paydan imtina etsələr, İlham Qasımovun azadlığına qovuşmasını təmin edə bilər. Bu isə müvəkkilimin Baş Prokurorluğun İdarə rəisinin sifarişi ilə qanunsuz həbsə alındığını bir daha sübut edir”.

Vəkil İ.Qasımovun sifarişlə həbs olunduğunu bir daha vurğulayaraq, bu işdə hakimin xüsusi roluna diqqəti çəkib: “Hörmətli cənab Prezident! İş adamı İlham Qasımovun həbsi sifarişlə həyata keçirilib. Respublika Baş Prokurorluğu yanında Korrupsiyaya Qarşı Mübarizə İdarəsinin rəisi Kamran Əliyev məhkəmənin mülki qaydada baxdığı iş üzrə cinayət işi başlayıb. Bununla da mülki iş cinayət işinə çevrilib.

Korrupsiyaya Qarşı Mübarizə İdarəsi tez-tələsik 18 cilddən ibarət cinayət işini məhkəməyə göndərib. İş baxılmaq üçün Bakı Ağır Cinayətlər Məhkəməsinin hakimi Zeynal Ağayevin icraatına verilib. Hansı ki, bu hakim işdə maraqlı tərəf olan general Müqəddəs Sultanovun yaxın qohumudur.

Elə ortada olan faktlar da, yaxınlarının dedikləri də göstərir ki, müvəkkilim İlham Qasımovun həbsi bilavasitə general Müqəddəs Sultanovun sifarişi ilə həyata keçirilib.

Bu, Zeynal Ağayevin sədrlik etdiyi məhkəmə prosesində də bir daha özünü göstərdi. Belə ki, məhkəmənin gedişində hakim Zeynal Ağayev bir dəfə də olsun dəymiş ziyan barədə fikir bildirmədi. Hakim heç olmasa ədalət məhkəməsi adını daşıdığını xatırlayaraq, Azərbaycan Respublikası CPM-in 308.2 və 313-cü maddələrinə nəzər salsaydı, görərdi ki, İlham Qasımovun həmin şirkətdə hər hansı vəzifə tutduğunu təsdiq edən heç bir sənəd yoxdur.

Bundan əlavə məhkəmənin gedişində heç bir şikayətçi aşkar olunmadı. İttiham aktında ”zərərçəkən” kimi təqdim edilən şəxslər məhkəmədə “biz heç bir zərər çəkməmişik, Korrupsiyaya qarşı Mübarizə İdarəsinə ərizə ilə müraciət etməmişik, bizi idarəyə məcbur aparıblar. İlham Qasımova qarşı heç bir şikayətimiz yoxdur” demişdilər. Hakim isə bunları belə nəzərə almadı.

Eyni zamanda ittihamda İlham Qasımov tərəfindən külli miqdarda pulunun mənimsənildiyi iddia edilən Gülağa Qəmbərov da müvəkkilimə qarşı hər hansı iddia ilə çıxış etməyib. Məhkəmə prosesində cəmi bir dəfə iştirak edən Gülağa Qəmbərovun müdafəçilər tərəfindən verilən suala cavabı belə olub: “Mən bura barışığa gəmişəm. Mən heç kimi həbs etdirmirəm, həbsdən azad edirəm”.

Pulu mənimsənildiyi iddia edilən Gülağa Qəmbərov müvəkkilim İlham Qasımovdan heç bir şikayətinin olmadığını bildirir. Ancaq hakim Zeynal Ağayev bunu da nəzərə almayaraq, müvəkkilimə 15 il azadlıqdan məhrumetmə cəzası verir. Bu fakt da hakim Zeynal Ağayevin müvəkkilim, iş adamı İlham Qasımov barəsində qərəzli olduğunu, sifarişli qərar çıxardığını təsdiqləyir”.

Daha sonra vəkil hakim Zeynal Ağayevin sifarişli və qərəzli qərar çıxarıldığını təsdiqləyən faktları qeyd edir: “Hörmətli Prezident! Hakim Zeynal Ağayev tez-tələsik qərar çıxardığından məhkəmə protokolunda 11 adda bağışlanılmaz səhvə yol verib. Bunlar aşağıdakılardır:

1) Cinayət işinin 12-ci cild 4-14-cü səhifələrində proses iştirakçılarına məhkəmə bildirişlərinin, qanundan hüquq və vəzifələrə dair çıxarışların göndərilməsi barədə qeyd edilən sənədlərin surətləri vardır. Bildirirəm ki, həmin göndərişlər içərisindən məhkəmə bildirişi, hüquq və vəzifələrə dair qanundan çıxarışların İ.Qasımova göndərilməsini təsdiq edən hər hansı sənəd yoxdur. Hesab edirəm ki, həmin sənədlər İ.Qasımova göndərilməmişdir. Sadəcə olaraq, həmin sənədlərin surətləri cinayət işinə əlavə edilmişdir ki, guya həmin sənədlər İ.Qasımova göndərilmişdir.

2) Məhkəmənin 20 sentyabr 2016-cı il tarixli iclasında İ.Qasımovun adından qeyd edilib ki, guya o, məhkəmə aktını və məhkəmə bildirişini aldığını bildirir. Belə bir hal mövcud olmamışdır.

3) Müdafiəçilər tərəfindən vəsadətlər 20 sentyabr 2016-ci il tarixli iclasda deyil, 23 sentyabr tarixli iclasda verilmişdir. Həmin hal məhkəmə iclas protokolunda düzgün əks etdirilməmişdir.

4) Protokolda qeyd edilir ki, guya tərəfimdən verilmiş vəsadətlərdən müvafiq sənədlərin sübutlar siyahısından çıxarılması, əlavə şahidlərin dindirilməsi barədə vəsadətlərin cinayət işinin hazırki mərhələdə araşdırılmadan saxlanılması barədə qərar alınmışdır. Məhkəmə iclasında belə bir qərar qəbul edilməmişdir. Müvafiq sənədlərin sübutlar siyahısından çıxarılması barədə vəsadət rədd edilmişdir. Əlavə şahidlərin dindirilməsi barədə vəsadət təmin olunmuş və həmin şahidlər növbəti məhkəmə protokollarında həmin qərarların müzakirə edilməsi və müvafiq qərarların qəbul edilməsi barədə hər hansı qeyd yoxdur.

5) Gülağa Məmi oğlu Gəmbərovun ifadəsi düzgün yazılmamışdır. O, məhkəmədə yalnız bir dəfə iştirak etmiş, ittiham aktının surətini və məhkəmə bildirişini aldığı, onun iştirakı olmadan keçirilmiş məhkəmə iclas protokolu ilə tanış olduğu barədə hər hansı ifadə işlətməmişdir. İş materiallarında onun ittiham aktının surətini və məhkəmə bildirişini alması və onun iştirakı olmadan keçirilmiş məhkəmə iclasının protokolu ilə tanış olmasını təsdiq edən hər hansı sübut yoxdur.

6) G.Gəmbərov ifadəsində göstərir ki, o məhkəmə iclasına birbaşa hava limanından gəlir, cinayət işi və mülki işlə onun vəkilləri məşğul olurlar.

7) G.Gəmbərov ifadəsində göstərir ki, o, İ.Qasımov ilə yaxın tanışları, hazırda Azərbaycan Respublikası Baş Prokurorluğunda çalışan Müqəddəs Sultanov vasitəsi ilə tanış olublar. O, M.Sultanovu gənclik illərində tanımış və Moskva şəhərində təhsil alarkən ona kostyum almışdır. G.Qəmbərovun həmin ifadəsi məhkəmə iclas protokolunda öz əksini tapmamışdır.

8) G.Qəmbərov ifadəsində “05.09.2014” yazıları ilə başlayan “1.500 verilib” sözləri ilə bitən qeydə istinad etməmişdir. Həmin ifadə məhkəməyə sədrlik edən və məhkəmə iclas katibi tərəfindən yazılmışdır.

9) G.Gəmbərov ifadəsində göstərir ki, İ.Qasımovu həbsdə gördüyü üçün ürəyi ağrıyıb və ona şeir həsr edib. O, şeiri oxumaq istəyib, lakin sədrlik onun sözlərini kəsərək mahiyyət üzrə ifadə verməsini tələb edib. G.Qəmbərov ifadə verdikdən sonra İ.Qasımov da ifadə verib və onlar arasında polemika başlayıb. Sonunda G.Qəmbərov İ.Qasımovdan şikayəti və tələbi olmadığını bildirib. Həmin faktlar məhkəmə iclas protokolunda öz əksini tapmamışdır.

10) Məhkəmənin 14.11.2016-cı il tarixdə iclas protokolunda qeyd edilib ki, guya sənədlər elan və tədqiq olunur. Həmin fakt doğru deyildir. Biz sənədlərin tədqiq edilməsini sədrlikdən xahiş etsək də, vəsadətimiz rədd edilmişdir. Hər hansı video və audio səslənmədən istifadə olunmamışdır.

11) Məhkəmənin 30.11.2016-cı il tarixli iclas protokolunda qeyd edilir ki, guya müdafiəçilər məhkəmə iclasında iştirak etmişlər. Həmin fakt doğru deyildir. İ.Qasımovun müdafiəçiləri rəsmi şəkildə 30.12.2016-cı il tarixdə başqa–başqa yerlərdə məhkəmə iclaslarında olmuşlar”.

Qohum general M.Sultanovun tapşırığı və sifarişi dövlətimizin qanunlarından vacibdirmi? İnsan taleyi sizin üçün çox ucuzdurmu?

Möhtərəm Prezident, məhkəmə prosesində müvəkkilimin – İ.Qasımovun tam günahsız olduğu, sifarişlə tutulduğu təsdiqləndi. Ancaq hakim tam ədalətsiz qərar verdi.

Odur ki Sizdən işin yenidən araşdırılması, ədalətli və qanuni qərar çıxarılmasına dair göstəriş verməyinizi xahiş edirəm. Əvvəlcədən minnətdarlığımı bildirirəm”.

R.Əliyev

AzPolitika.info

Vəkilin iddialarını sübut edən sənədləri təqdim edirik: