Musavat.com bununla bağlı erməni mediasına istinadən xəbər yayıb. Babayanın vəkili Avetis Kalaşyanın sözlərinə görə, “keçmiş nazir” özünə qarşı ittihamları əsassız sayıb. S.Babayan ifadəsində qeyd edib ki, ittihamda əksini tapan şübhəli məqamların ona hər hansı aidiyyatı yoxdur. Həmçinin o, silah qaçaqmalçılığı faktı üzrə həbs edilən digər iki Ermənistan vətəndaşı haqqında heç nə bilmədiyini də iddia edib. Vəkil deyib ki, istintaq sirri səbəbindən və müvəkilinin maraqları baxımından bundan əlavə heç nə deyə bilməyəcək. Ancaq əlavə edib ki, Babayanın həbsinin səbəbləri onun özünə də məlum deyil.

Vəkil S.Babayanın həbsi və “Ohanyan-Raffi-Oskanyan” seçki blokunun fəaliyyəti arasında hər hansı əlaqənin olub-olmadığı barədə suala cavab verməkdən yayınıb.

Qeyd edək ki, ilkin məlumatda S.Babayanın Gürcüstandan Ermənistana “İqla” zenit-raket qurğusu gətirməkdə ittiham olunuğu bildirilirdi. Hətta “Samo” ləqəbli quldurun dövlət çevrilişinə hazırlaşdığı və bu məqsədlə ölkəyə silah-sursat daşıdığı da iddia olunub.