Qol.az-ın xəbərinə görə, bu haqda “The Guardian” məlumat yayıb. Bildirilib ki, London klubu növbəti mövsüm də komandada saxlamaq istədiyi italiyalı mütəxəssisə ilinə 7.5 milyon funtdan çox (9 milyon avrodan çox) təklif edib. Onunla danışıqlar mayın 27-də “Arsenal”a qarşı kubokun final oyunundan sonra başlayacaq.

Əgər yeni müqavilə imzalanarsa, Konte “Çelsi” tarixinin ən çox qazanan məşqçisi olacaq. Buna qədər rekord Joze Mourinyoya məxsus idi (ilinə 7.5 milyon avro). Bundan başqa, tərəflər razılığa gələcəyi halda, Kontenin “Çelsi”dən transfer büdcəsini 200 milyon funta kimi artırmağı tələb edəcəyi bildirilir.

Qeyd edək ki, Antonio Konte bu mövsüm London klubuna İngiltərə çempionu adını qazandırıb. Onunla İtaliya “İnter”inin də danışıqlar apardığı bildirilir.

Hazırda Konte ilinə 6.5 milyon funt qazanır. Bu isə Xosep Qvardiola (“Mançester Siti”), Mourinyo (“MY”), Arsen Venger (“Arsenal”) və Yurgen Kloppun (“Liverpul”) gəlirindən azdır.