Sahibkarların sözlərinə görə, Kəbirə Məmmədova mağaza sahiblərinə bildirir ki, vergi bazara girmək istəyir, ona görə aylıq 350 manat əlavə ödəniş etməlisiz.

"Bundan əvvəl də vergi adı ilə hər mağaza azı 250 manat ticarət mərkəzinin sahibinə pul ödəyib. Bu günə qədər vergi adı ilə bizdən alınan pullara görə heç bir sənəd verilməyib, nə qəbz, nə başqa bir şey. İndi də onu artırıb 600 manat edirlər, amma sahibkarların hamısı bundan narazıdır”.

Sahibkarlar bildirir ki, ticarət mərkəzində onsuz vəziyyət ürəkaçan deyil, üstəlik onların xərcləri, yükləri bazar rəhbərliyi tərəfindən müxtəlif yollarla ağırlaşdırılır.

"Ayda 1000-1500 manat icarə haqqı, üstəlik 250 manat vergiyə, indi də əlavə 350 manat yenə vergi pulu təyin ediblər. Bizim qazancımız nədir ki, olan qalanımızı da bazar sahibi Kəbirə Məmmədovaya verək?”

Sahibkarlar bildiriblər ki, ticarət mərkəzində belə qanunsuzluqlar, haqsızlıqlar davam etsə, kütləvi şəkildə Prezident Administrasiyasının qarşısına şikayətə gedəcəklər.

Məsələ ilə bağlı Binə Ticarət Mərkəzinin rəhbərliyindən münasibət öyrənməyə çalışsaq da, telefon zənglərimiz cavabsız qaldı.

Mənbə: abzas.org