BakuPost-un məlumatına görə, Nazirlər Kabineti bununla bağlı "Vahid təqvim planına uyğun olaraq keçirilən ölkə və beynəlxalq gənclər tədbirləri üçün vəsaitlərin xərclənməsi Normaları”nın təsdiq edilməsi haqqında” qərarında dəyişiklik edib.

Beləliklə, 2007-ci ildən indiyə qədər qüvvədə olan normaya əsasən, nazirliyin təşkil etdiyi beynəlxalq səviyyəli gənclər tədbirlərində iştirak edən nümayəndə heyətinin rəhbəri üçün yarımlüks nömrə ayrılmalı idi. Normada nazirlər və onlara bərabər tutulan şəxslər və digər fəxri qonaqlar ayrıca qeyd edilməsə də, aydındır ki, onlara da nümayəndə heyətinin rəhbəri ilə eyni münasibət göstərilib. Yeni qərara əsasən isə bundan sonra nümayəndə heyətinin rəhbəri, nazirlər və onlara bərabər tutulan şəxslər və digər fəxri qonaqlar üçün tədbirin keçirildiyi yerə uyğun olaraq, 4 ulduzlu mehmanxanalarda süit, 5 ulduzlu mehmanxanalarda kiçik süit və ya birnəfərlik otaq ayrılacaq. 

Nümayəndə heyətinin üzvləri üçün də yerləşdirməyə dair norma dəyişib. İndiyə qədər nümayəndə heyətinin üzvləri üçün bir yerlik və yaxud iki yerlik nömrə ayrılıbsa, bundan sonra onlara 4 və ya 5 ulduzlu mehmanxanalarda iki çarpayılı otaq ayrılmalıdır.