Bu sözləri Axar.az-a açıqlamasında daşınmaz əmlak eksperti Ramil Osmanlı Nəsimi bazarının sökülməsi ilə bağlı yayılan xəbərlərə münasibət bildirərkən deyib. Onun sözlərinə görə, bazarın sökülməsi müsbət hadisə olsa da, yerində yaşayış binasının tikilməsi ərazidə bir sıra problemlərin yaranmasına gətirib çıxaracaq:

“Ümumilikdə götürdükdə bazarın sökülərək yerində çoxmərtəbəli binaların tikilməsinin tərəfdarı deyiləm. Çünki bu, nəqliyyat infrastrukturunun daha da iflic vəziyyətə düşməsinə gətirib çıxaracaq. Digər tərəfdən isə həmin ərazidəki məskunlaşmanın sıxlığını artıracaq.

Bazarın sökülməsi yaxşı hal olsa da, göydələnlərin tikilməsi ilə orda ikinci bir “bazar” yaranmış olur. Əvvəl orda sadəcə, kənd təsərrüfatı bazarı mövcud idisə, indi 4 hündürmərtəbəli binanın birinci, ikinci mərtəbələrində kommersiya obyektləri fəaliyyət göstərəcək. Həmin obyektlər də əslində bazar hesab oluna bilər. Azadlıq prospekti kimi mühüm bir nəqliyyat axını olan yolun kənarında yerləşən bazarın sökülərək yerində bina tikilməsi təbii ki, nəqliyyat sıxlığı yaradacaq, digər böyük küçələrə çıxışları məhdudlaşdıracaq”.

R.Osmanlı Nəsimi bazarının yerində tikiləcək göydələnlərin kommunal problemlər də yaradacağını söyləyib:

“Paytaxtda Nəsimi bazarı ilə yanaşı, bəzi ərazilərdəki bazarların da yeri dəyişdirilməlidir. Təəssüf ki, şəhər mərkəzində 5 və 9 mərtəbəli köhnə binaların yaxınlığında yerləşən ərazilərdə inşa olunan yeni tikililərin, çoxmənzilli binaların əksəriyyətində infrastrukturun yenilənməsi prosesi həyata keçirilmir. Bu proses kifayət qədər xərc tələb etdiyindən bəzi hallarda tikinti şirkətləri sadəcə köhnə binaların kommunal xətlərindən istifadə edirlər. Bu da əlavə yüklənməyə gətirib çıxarır və nəticə etibarilə çox ciddi problemlər yaranır. Təsəvvür edin ki, 200 ailənin məskunlaşdığı ərazi üçün nəzərdə tutulmuş kommunal təchizatdan 2000 ailə istifadə etməli olacaq”.

Qeyd edək ki, bu ilin sonuna kimi Bakının məşhur Nəsimi bazarı söküləcək. Bazarın ərazisi "Pilot layihə”yə salınıb. Artıq obyektin yaxınlığında söküntü işlərinə başlanılıb. Bu ilin sonunadək bazar tam sökülərək, yerində 4 böyük göydələnin tikintisinə başlanılacaq.

Binaların “OLYMPUS park” şirkəti tərəfindən inşa ediləcəyi bildirilir.