Xatırladaq ki, Qüdrət Şükürovla bağlı qalmaqal onun əvvəllər evli olmuş qızının “Böyük Saray”da 400 min dollarlıq toyla yenidən ailə qurması barədə xəbərlərin yayılmasından sonra başlayıb. Keçmiş qudası Rafail Əsgərovun müxtəlif dövlət instansiyalarına göndərdiyi məktublarda Şükürovun 2013-cü ildə Rusiyanın “Otis Lift” şirkəti ilə bağladığı müqavilədən milyonlarla dollar “otkat” alması, həmin pullara dərhal İstanbulun “Koru Florya” elit yaşayış kompleksində 1.5 milyon dollara iki mənzil alması barədə ətraflı bəhs olunub. Habelə keçmiş quda Şükürovun digər çoxsaylı korrupsiya və mənimsəmə əməlləri barədə danışıb.

Məsələn, Q.Şükürov 2013-cü ildə qudası R.Əsgərovdan bir neçə dəfə onunla “Elmlər Akademiyası”nın yaxınlığındakı köhnə 5 mərtəbəli binanın 1-ci mərtəbəsində yerləşən “Azəriqazbank”ın filialına gedib pul çıxarmağı xahiş edib. Qüdrət Şükürov hər dəfə bankdan 400, 500, 700 min dollar pul çıxarıb. Qudası bildirir ki, 2015-ci ilin fevralında, manatın birinci devalvasiyasından əvvəl Qüdrət Şükürov yaxınlaşan “manat fəlakətindən” xəbər tutaraq böyük panika içərisində bütün pullarını  dollara (8 milyon dollar) çevirib.