KXDR lideri Kim Çen Inın dəvəti ilə baş tutan səfər Si Cinpinin Çinin dövlət başçısı kimi Şimali Koreyaya ilk gəlişidir.

Çin tərəfi iki ölkə arasında diplomatik əlaqələrin qurulmasının 70-ci ildönümünə təsadüf edən bu səfərin ikitərəfli münasibətlərin inkişafında yeni mərhələni başladacağına inanır. Sinxua agentliyinin yaydığı məqalədə vurğulanır ki, bu səfər həm də gərgin vəziyyətin yarandığı bir dövrdə Koreya yarımadasında davamlı sülhün və sabitliyin təminatına kömək edəcək.

“Beynəlxalq vəziyyətin necə dəyişməsindən asılı olmayaraq, Çin Kommunist Partiyası və Çin dövləti Çin-KXDR münasibətlərinin inkişafı və möhkəmlənməsi ilə bağlı qəti mövqe tutub və bundan sonra da tutacaqdır”, – deyə Çin liderinin səfərdən əvvəl Şimali Koreya mətbuatında dərc olunmuş məqaləsində vurğulanır.

Qeyd edək ki, son bir ildə iki ölkə arasında ən yüksək səviyyədə dialoq intensiv xarakter alıb. Nüvə-raket proqramının dayandırılması ilə bağlı Şimali Koreyanın ABŞ-la apardığı danışıqlarla yanaşı, KXDR lideri Kim Çen In Birləşmiş Ştatların Prezidenti Donald Trampla iki dəfə, Çinin Sədri Si Cinpinlə isə üç dəfə görüşüb(azərtac).