Qol.az-ın klubun rəsmi saytına istinadən yaydığı xəbərə görə, yerli azarkeşlər arasında keçirilən səsvermənin nəticələrinə əsasən, PAOK-dan icarəyə götürülən Pedro Enrike 2018-in ən uğurlu transferi seçilib. Səsvermədə ümumilikdə 4641 nəfər iştirak edib və 5 legioner - Riçard Almeyda, Pedro Enrike, Antonio Rukavina, Ranqelo Yanq və Junior Kabananqa arasında seçim edilib.

Azarkeşlərin 53,72 faizi ötən mövsüm "Qarabağ"da da icarə əsasında çıxış etmiş Pedroya səs verib. A. Rukavina 29,71 faiz səslə 2-ci, J. Kabananqa isə 10,67 faiz səslə 3-cü olub. Milli komandamızın üzvü R. Almeyda isə "3-lüy"ə düşə bilməyib.

Qeyd edək ki, "Astana"nın heyətində 19 oyun keçirən Pedro 3 qol və 1 məhsuldar ötürmə ilə yadda qalıb.