Bu barədə virtualaz.org saytına oxucular məlumat veriblər.

Şikayətçilərin sözlərinə görə, yollarda piyada zolaqları görünmür: “Yağışlı və qarlı havalarda piyada zolağının görünməməsi xüsusilə azyaşlılar üçün çətinlik yaradacaq. Məktəblərin yaxınlığındakı piyada zolaqlarına daim nəzarət etmək lazımdır”.

Ekspert Ərşad Hüseynov isə sayta açıqlamasında bildirib ki, yollarda piyada zolaqları və yol nişanlarına Baş Dövlət Yol Polisi İdarəsi, eləcə də nəqliyyat agetnliyinin əməkdaşları nəzarət etməlidirlər: “Xidməti ərazidə olan polis əməkdaşları yol nişanlarına, piyada zolaqlarına nəzarət etməli, piyada zolağı pozulduğu halda dərhal məruzə eləməlidirlər. Yol nişanı və ya piyada zolaqları dərhal bərpa olunmalıdır”.

Ə.Hüseynov əlavə edib ki, əgər nişanlama və ya piyada xətti sürücünün görə bilməyəcəyi vəziyyətdədirsə, sürücü məsuliyyətə cəlb edilməyə bilər. “Burada birinci növbədə təhlükəsizliyin təminindən söhbət gedir. Yəni ilk növbədə təhlükəsizlik tədbirləri görülməlidir. Piyada zolaqları və yol nişanları təzələnməli , zolaqlar xüsusi parlaqlığa malik ağ rəngli boyalarla rənglənməlidir. Piyada zolağı pozularsa dərhal yenidən rənglənməlidir”,-Hüseynov qeyd edib.