Musavat.com xəbər verir ki, Bakı Ağır Cinayətlər Məhkəməsində insan alverində ittiham edilən Xəyal Ələkbərov və Zəhra Quliyevanın cinayət işi üzrə məhkəmə iclası keçirilib.

Hakim Mahmud Ağalarovun sədrliyi ilə keçirilən məhkəmə iclasında dövlət ittihamçısı ittiham aktını elan edib.

İttihamda yazılır ki, təqsirləndirilən şəxslər qabaqcadan əlbir olan bir qrup şəxs halında bir neçə nəfər qadını qadını Türkiyəyə aparıb.

Belə ki, 5 nəfər- Arzu Səmədova, Şəhanə Qadımova, Nərgiz Cəfərova, Ruhiyyə Alıyeva və Pərvanə Məmmədova (ad və soyadlar şərtidir) təqsirləndirilən şəxslərin cinayət əməllərinin qurbanları olublar.

İttihamda yazılır ki,onlar 5 nəfəri Türkiyəyə yüksək maaşla işləmək adı ilə aparıblar. Qurbanları avtobus və təyyarə ilə Türkiyəyə yol salıblar. Onları Türkiyədə Zəhra Quliyeva özü qarşılayıb. Onların xarici pasportunu alaraq onları cinsi istismara məruz qoyub və yaşadıqları evdə ayrı-ayrı şəxslərlə intim münasibətdə olmağa məcbur ediblər.

Elan olunmuş ittihamla Xəyal Ələkbərov özünü təqsirli bilməyib. O deyib ki, zərərçəkmiş qadınları Türkiyəyə iş üçün göndərib.

Zəhra Quliyeva da özünü təqsirli bilmədiyini deyib.

Zərərçəkmiş şəxslər isə məhkəmə prosesində iştirak etməyib.