Prezident İlham Əliyev 2014-cü ildə  “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın təsdiq edilməsi haqqında fərman imzalamışdı. Fərmanda Nazirlər Kabinetinə aidiyyəti mərkəzi və yerli icra hakimiyyəti orqanları ilə birlikdə Dövlət Proqramının icrasını təmin edən zəruri tədbirlər görmək tapşırılmışdı.

Həmçinin, Nazirlər Kabineti İqtisadiyyat və Sənaye Nazirliyi Maliyyə Nazirliyi ilə birlikdə hər il üçün Dövlət İnvestisiya Proqramı tərtib edilərkən Dövlət Proqramında illər üzrə nəzərdə tutulan tədbirlərin icrasını təmin etməli,  NK İqtisadiyyat və Sənaye Nazirliyi ilə birlikdə Dövlət Proqramının maliyyələşdirilməsinə investisiyaların cəlb edilməsi məqsədi ilə beynəlxalq maliyyə institutları, xarici ölkələrin müvafiq qurumları və iş adamları ilə danışıqlar aparmalı idi. Bu, regionların sosial-iqtisadi inkişafı üçün təsis edilmiş sayca üçüncü proqram idi. Və bu il yekunlaşır.

Millət vəkili Vahid Əhmədovun sözlərinə görə, “2014-2018-ci illərdə sosial-iqtisadi inkişafı Dövlət Proqramı”nda çərçivəsində faktiki olaraq əksər regionlarda su təchizatı, elektrik enerjisi, qaz, yollarla bağlı işlər yerinə yetirilib: “Bir çox regionlarda qaz, su təchizatı, elektrik enerjisi və s. bağlı ciddi problem yoxdur. Olsa da, uzaq kəndlərdə problem qala bilər. Amma problemlərin əksəriyyəti həll olub. Şimal bölgəsində problem yoxdur”.