Qol.az-ın “Marca”ya istinadən yaydığı xəbərə görə, portuqaliyalı ulduz futbolçunu “Yuventus” transfer edə bilər. 33 yaşlı forvardın “kral klubu” ilə münasibətlərinin pisləşməsindən istifadə edən “qoca sinyora” oyunçunun transferi ilə bağlı hərəkətə keçib.

İtaliyanın “Tuttosport” nəşrinin iddiasına görə isə Turin klubu artıq futbolçu ilə şəxsi müqavilə şərtlərində razılığa gəlib. Ronaldonun “Yuventus”la 4 illik müqavilə bağlayacağı və ümumilikdə 120 milyon avro (illik 30 milyon) qazanacağı bildirilib. İtalyan klubunun nümayəndələrinin “Real” rəhbərliyi ilə əlaqə saxladığı və 120 milyon avroluq təzminat məbləğini ödəməyə hazır olduqlarını bildirmələri  iddia olunur.

Qeyd edək ki, bir müddət öncə “Real” Ronaldo üçün 1 milyard avroluq təzminat qiyməti müəyyənləşdirmişdi. Ancaq rəhbərliklə portuqaliyalı futbolçu arasında belə bir razılıq var ki, PSJ və ya “Barselona”dan birinə keçməyəcəyi təqdirdə klub təzminat məbləğini 120 milyona endirəcək.