Çinin Səudiyyədəki səfiri Li Huaxin ilə Çin səddində olan şahzadənin Asiyada xüsusi çəkisi olan ölkələrə səfəri diqqətlə izlənilir. Bir çox analitiklər qeyd edir ki, Səudiyyə Ərəbistanı Asiya ölkələri ilə münasibətləri dərinləşdirmək fikrindədir.

Məhəmməd bin Salman bəyan edib ki, qədim dövrlərdə Çinlə ərəblər arasında ciddi ticarət əlaqələri olub və biz heç vaxt Çinlə hər hansı bir problem yaşamamışıq.

Siyasi analitiklər qeyd edir ki, Çin də Yaxın Şərqin açar ölkəsi olan Səudiyyə Ərəbistanı ilə ticarət əlaqələrini gücləndirməkdə maraqlıdır. Şahzadənin hazırladığı “Səudiyyə Ərəbistanı 2030” layihəsində də Çin xüsusi yer almaq fikrindədir.

Çin baş nazirinin birinci müavini Han Zheng şahzadəyə təklif edib ki, iki ölkə arasında enerji, infrastruktur tikililəri, maliyyə və yüksək texnologiya sahəsində birgə işlər görmək olar.

Səudiyyənin ən nəhəng şirkəti olan “Aramco” 10 milyard dollarlıq anlaşmanın detallarından danışıb, tikintisi nəzərdə tutulan neft-kimya komplekslərinin hər iki ölkəyə verəcəyi xeyri vurğulayıb.

Səudiyyə Ərəbistanı ilə Çin arasında digər sahələrlə bağlı da 35 sənəd imzalanıb. İki ölkə arasında terrora qarşı birgə mübarizə ilə bağlı da anlaşma əldə olunub.

“Xinhua” agentliyi bildirib ki, şahzadə Çinin xarici ölkələrin rəsmi Pekinin daxili işlərinə qarışmasına qarşı çıxmasını müdafiə edib. Bildirib ki, bir ölkənin təhlükəsizliyi üçün bu, çox önəmlidir.

O da vurğulanır ki, Camal Qaşıqçı olayından sonra Qərblə anlaşmada ciddi çətinliklərlə üzləşən şahzadə Məhəmməd bin Salman Asiyada özünə yeni müttəfiqlər axtarır.

Musavat.com