“Qarabağı da alıb, qələbə çaldıq. 44 gün müddətində əsgərlərimizin salamatlığı üçün dualar etdik, gedib şikayət eləmədik. Dedik ki, dövləti belə işlərlə məşğul etməyək. Müharibə qurtarar, bizim də torpağımızı alıb özümüzə qaytararlar. Amma görürük ki, Çingiz də, Daşqın da ortada gəzirlər. Bizə gəlib söhbətləri çatır ki, pul verib canlarını qurtarmaq istəyirlər. Bizim yaşlı olmağımızı düşünüb, tez bir zamanda istəklərinə nail olacaqlarını zənn edirlər. Elə olmayacaq, arxayın olsunlar. Əllərimizi yaxalarından çəkən deyilik. Zeynəb Xanlarovaya da müraciət edərəm ki, bu cinayətə qarışmasın, bu adamların haramçılığına qol qoymasın”,- deyə Əzizəxanım Atayeva “Yeni Müsavat” deyib.

Daşqın Nəsirovun, Çingiz Səfərovun və torpaqları ələ keçirən dəstənin digər üzvlərinin əməlləri nəticəsində çoxuşaqlı ailənin başçısı olan Əzizəxanım Atayevanın xəbəri olmadan onlara məxsus bağ-torpaq sahəsi özgəninkiləşdirilib. Eyni sxem üzrə 90 yaşlı Xumara Şabanovanın da həyat yoldaşının adına olan bağ-torpaq sahəsi ələ keçirilərək satılıb. Yaxşı düşünülmüş bu cinayət sxemi üzrə Türkan qəsəbəsində 10-a yaxın bağ-torpaq sahəsinin ələ keçirilməsi haqda iddialar var. İstintaqın gedişatında bu sayaq bütün cinayətlərin üzə çıxacağı istisna olunmur. Yazıda adı hallanan hər kəsi dinləməyə hazırıq.