BBC Türkiyədə «yox» – «hayır» sözünün, az qala, yasaqlandığını yazır. Məsələ burasındadır ki, referendum öncəsi hökumət konstitusiyaya dəyişiklikləri qəbul etdirməkdən, yəni dəyişikliklərə «hə» dedirtməkdən ötrü kampaniyaya başlayıb. İstanbulun hər yerində «dəyişikliklərə «hə»deyək» çağırışlı şüarlar asılıb. Siqaretə qarşı təbliğat bukletləri isə üzərində «yox» yazıldığına görə yığışdırılıb, parlament üzvlərindən biri bukletlərin xalqı çaşdıra biləcəyini deyib.

 «Digitürk» kabel provayderi «Oscar»a namizəd olan və Pinochet rejiminin referendumdakı məğlubiyyətindən bəhs edən «No» (Yox) filminin yayımını dayandırıb. BBC «Digitürk»ü yaxın keçmişdə prezident Rəcəb Tayyib Ərdoğana yaxın olan Qətər şirkətinin aldığını xatırladır. Şirkət filmin yayımının dayandırılması haqda suallara cavab vermək istəməyib.

Prezident Ərdoğan bu yaxında çıxışlarından birində deyib ki, «yox» deyənlər sui-qəsdçilərin tərəfində dayandıqlarını göstərəcəklər: «Separatçı, terrorçu «yox» deyər, «yox» deyənlər onların yanında dayananlar olar». Ankara meri də Twitter hesabında «bütün satqınlar «yox» deyirlər»yazıb. Rəsmilər, əlbəttə, konstitusiyaya dəyişikliklərə «yox» deyənləri nəzərdə tuturlar.

BBC müəllifi isə indi türklərin hətta «xeyirli» mənası verən «hayırlı» sözünü də işlətməkdən çəkindiyini (kökü «hayır» sözüylə omonim olduğuna görə), məsələn, «hayırlı cumalar» yerinə «cumamız mübarək» dediklərini yazır.Bu günlərdə İstanbulun Kadıköy rayonunda polis işçiləri konstitusiya dəyişikliklərinə «yox» kampaniyası aparan qrupa hücum ediblər. İnternetdə yayılan videolarda polisin silaha əl atdığını, gözyaşardıcıqazdan istifadə etdiyi görünür.

Türkiyənin ən çox satılan qəzetlərindən biri, getdikcə hökumətə meyllənən «Hürriyet» yazıçı, Nobel mükafatçısı Orhan Pamukla müsahibəni təxirə salıb. Yazar bir az əvvəl referendumda «yox» deyəcəyini elan edibmiş.

Keçən həftə isə «Kanal D» məşhur aparıcısını – İrfan Degirmençi sosial şəbəkələrdə referenduma «yox» kampaniyası apardığına görə işdən qovub. Türkiyədə referendum aprelin 16-na təyin olunub. Səsverməyə çıxarılacaq konstitusiya düzəlişləri prezidentin səlahiyyətlərinin və fəaliyyət müddətinin uzadılmasını nəzərdə tutur. Ərdoğanın tərəfdarları bu dəyişikliyin ölkənin qarşısında dayanan sınaqların öhdəsindən gəlmək, hakimiyyəti gücləndirməkdən ötrü vacib olduğunu deyir. Tənqidçilərin fikrincə, məqsəd şəxsən Ərdoğanın təkhakimiyyətliliyini təmin etməkdir.