Musavat.com-un məlumatına görə, bu barədə Eurasianet saytında Tacikistanda mümkün hakimiyyət dəyişikliyinə həsr olunmuş analitik məqalədə deyilir.

Materialda daha sonra bildirilir: “Hərgah, seçkiyə 2 ay qalmış ölkədə heç bir intriqa müşahidə edilmir. Yeganə sual indiki prezidentin - 67 yaşlı Emoməli Rəhmonun daha 7 il ali kürsüdə qalıb-qalmayacağı və ya hakimiyyət sükanını oğlu Rüstəm Emoməliyə verəcəyi ilə bağlıdır”.

Sayt qeyd edir ki, belə qeyri-müəyyənlik 2016-cı ildə keçirilmiş referendum zamanı qəbul edilən iki mühüm konstitusiya dəyişikliyindən qaynaqlanır: “Onlardan biri budur ki, artıq namizədlər üçün yaş həddi 35-dən 30-a endirilib (prezidentin oğlu Rüstəm Emoməlinin dekabrda 32 yaşı tamam olacaq). Digər mühüm dəyişiklik isə hazırkı prezidentə məhdudiyyətsiz dəfə prezident seçilmək hüququnun tanınmasıdır. Hətta ata Rahmon öz postunu oğluna və ya başqa kiməsə versə belə, ondan sonra da ölkədə güclü və dəyişməz qərar vermə səlahiyyətlərini özündə saxlayacaq. Çünki 2015-ci ildə qəbul olunmuş qanun ona xalqın lideri kimi xüsusi status tanıyır. Yeri gəlmişkən, Qazaxıstanda da keçmiş prezident Nursultan Nazarbayev prezidentlikdən gedəndən sonra xeyli dərəcədə hakimiyyət səlahiyyətlərini özündə saxlayıb”.

Bununla belə, gənc Rüstəm Emoməli xüsusilə də aprel ayından – ölkə parlamentin yuxarı palatasının spikeri olduğu dövrdən ali posta ciddi iddiaçı qismində görülür. “Parlamentin yuxarı palatasının sədri olaraq Emoməli artıq indinin özündə prezidentin ölümü və ya iş qabiliyyətini itirəcəyi halda onu əvəzləyə bilər. Bundan əlavə, Emoməli hələ də paytaxt Düşənbə şəhərinin meri vəzifəsində qalır”, - deyə məqalə müəllifləri vurğulayırlar.