Yenicag.az xəbər verir ki, bunu bu ilin birinci yarısında Dövlət Vergi Xidmətinin büdcə qarşısında proqnoza 24,4% və Dövlət Gömrük Komitəsinin 14,6%-dən çox əməl etməsini dəyərləndirən iqtisadçı Natiq Cəfərli deyib.

İqtisadçıya görə, gömrük rüsumları və vergilərin ölkənin tələbatına uyğunlaşmadan “hərfi” mənada tətbiqi bahalığa səbəb olur:

“Vergi və gömrük daxilolmalarının artması, ümumən, müsbət məsələdir. Lakin əsas sual budur ki, bu artım nəyin hesabına olub?! Bu ilin 1-ci rübündə ÜDM artımı demək olar ki, qeydə alınmadı. Deməli iqtisadi artım yox idi, hətta yanvar ayında ÜDM keçən ilin yanvar ayına nisbətən 2,5% azalmışdı. Bu, o deməkdir ki, vergi-gömrük daxilolmalarının artması iqtisadi fəallığın yüksəlməsi hesabına başa gəlmir. Çox güman ki, bu artım vergi-gömrük sahəsində “ağartmanın” nəticəsidir. İqtisadiyyatın “ağarması” müsbət tendensiyadır, amma bu addımın digər komponentləri, kompleks yanaşma olmayanda ödənilən hər manat sonunda istehlakçının cibindən çıxır.

Ölkədə istehsalı olmayan və ya çox az olan məhsullara ən yüksək gömrük rüsumlarının tətbiqi, bundan başqa gömrük orqanlarının özbaşına qiymət qoyma siyasəti və özlərinin təyin etdiyi qiymətdən rüsum və ƏDV hesablama praktikası büdcəyə əlavə vəsait gətirsə də, iş adamlarına yük olur. Nəticədə vətəndaş bunun bədəlini cibindən ödəyir”.