Səfərin məqsədi kimi formal olaraq Ermənistanla Rusiya arasında elə formal xarakter daşıyan diplomatik münasibətlərin (əslində vassal münasibətlərdən söhbət getməlidir) 25 illiyi göstərilir. Lakin şübhəsiz ki, səfər Qarabağ münaqişəsi zonasında son günlər artan eskalasiya ilə bir vaxtda baş tutduğundan Sərkisyanın Putinlə görüşündə bu məsələ də başlıca yer tutacaq.

Ola bilsin  Rusiya prezidenti uzun fasilədən sonra yenidən Azərbaycan və Ermənistan prezidentləri arasında üçtərəfli danışıqların təşkil edilməsi üzərində işləyir. Hansı ki, Moskva belə üçtərəfli görüşü təşkil etməyə hazır olduğunu ifadə edib, xarici işlər nazirləri ilə ayrı-ayrılıqda müzakirələr aparılıb.

Hazırda Rusiya Qarabağ nizamlanmasında əsas oyunçudur, ABŞ və Fransanın rolu prosesdə xeyli zəifləyib. Xüsusən də ABŞ-da Tramp administrasiyasının keçmiş sovet respublikalarındakı münaqişələr də daxil olmaqla Rusiya ilə maraqların kəsişdiyi əsas xarici siyasət məsələləri ilə hələlik maraqlanmadığı bir vaxtda. Qarabağ üzrə nüfuzlu ekspert Tomas de Vall da bildirib ki, ATƏT və BMT dəhlizlərində tərəfləri yeni müharibə riski haqda xəbərdar ediblər və müharibənin yenidən alovlanacağı halda Rusiyanın “əsas oyunçu olacağını”, yəni Qərbin proseslərə müdaxilə etmək imkanında olmayacağını deyiblər.

Xatırladaq ki, Rusiyanın Ermənistana “İsgəndər” operativ-taktiki raketlərini verməsindən sonra İrəvanda Azərbaycanla “tarazlıq yaratdıqlarına” inanmağa başlayıblar. Hərçənd Stokolmdakı Sülh problemləri araşdırmaları İnstitutunun (SIRRI) hesabatında deyildiyi kimi Azərbaycanın son illərdə Ermənistandan 25 dəfə çox silah aldığı bir vaxtda  tarazlığı təkcə bir neçə yaxın mənzilli raketlə yaratmaq real deyil. Digər tərəfdən Azərbaycanın İsraildən həmin “İsgəndər”ləri neytrallaşdıra biləcək güclü raketdən müdafiə sistemləri aldığı, o cümlədən almağa hazırlaşdığı bir vaxtda Ermənistanın tarazlığı bərpa etdiyi barədə əminliyi sarsılmış kimi görünür. Ona görə də mümkündür ki, Rusiya Ermənistanın bu əminliyini təzədən möhkəmləndirmək üçün ona yenə hansısa silahlar verə bilər...