Qaynarinfo-nun məlumatına görə, Kürdəmir rayon sakini Abbasqulu 1983-cü ildən Bakı şəhəri, Dərnəgül prospektində yerləşən "Avto detal” zavodunda birlikdə işlədiyi biznesmen dostu Adilin 400 min dollarını mənimsəməkdə ittiham edilib. 

Abbasqulu 2019-cu ildə dostu Adildən 400 min dollar alıb. Bildirib ki, Sumqayıtda avtosalon icarəyə götürəcək, Almaniya və Gürcüstandan avtomobil gətirərək satacaq və qazancın yarısını ona verəcək. 

Adil Sumqayıtdakı salona gedən zaman orda Almaniyadan gətirilən avtomobillər olmadığını görüb və Abasquludan söz verdiyi maşınların niyə gətirilmədiyini soruşub, pulunu qaytarmağı tələb edib. 

Abasqulu ona deyib ki, Kürdəmir rayonu, Ərəbxana kəndində 7 kilodan artıq qızılı var. O, həmin qızılları kənddə basdırdığını və tapa bilmədiyini bildirib.

Daha sonra Adil Abasqulu ilə kəndə gedərək, qızılı axtarmaq qərarına gəlib. Kənddə qardaşı Əliqulu Abasquluya Adilin yaxşı adam olduğunu, ona hər şeyin düzünü deməyi məsləhət görüb. Adil bu sözü eşitdikdən sonra Bakıya qayıdıb.

Adilin şikayəti əsasında Abbasqulu saxlanılaraq məhkəməyə çıxarılıb. Məhkəmənin qərarı ilə o, Cinayət Məcəlləsinin 178.3.2-ci maddəsində nəzərdə tutulan cinayət əməlini törətməkdə təqsirli bilinib və 7 il 6 ay azadlıqdan məhrum etmə cəzasına məhkum olunub. Mülki iddia qismən təmin edilib. Belə ki, təqsirləndirilən şəxsdən 442 min 832 manat pul tutularaq zərərçəkmiş Adilə ödənilməsinə qərar verilib.