Kreditin faiz dərəcəsi ilə yanaşı, aylıq ödənişlərin də yüksək olması mənzil almaq istəyənləri çətin duruma salır.

Xezerxeber.az-ın xəbərinə görə, iqtisadçı Xalid Kərimli bildirib ki, kommersiya bankları daxili ipoteka kreditlərini bir qədər çətin şərtlər altında təklif edirlər. Onun sözlərinə görə, bu sahədə banklar tərəfindən fərqli yanaşmalar da mövcuddur.

Ekspert daxili ipoteka faizlərinin yüksək olmasını bankların bunu öz imkanları hesabına reallaşdırması ilə əlaqələndirib. Xalid Kərimli qeyd edib ki, bankların vətəndaşlara məbləğ olaraq daha çox ipoteka krediti təklif etmək imkanları da olur.

Amma bəzi hallarda ilkin ödənişlərin yüksək olması çətiliklər yaradır.

O, əlavə edib ki, daxili ipoteka krediti ödənilmədikdə ya girovluqda olan mənzil bankın hesabına keçir, ya da satılaraq borc geri qaytarılır.