APA-nın Britaniya bürosunun Britaniya XİN-ə istinadən verdiyi xəbərinə görə, sanksiyalar Ukraynanın dörd vilayətində qeyri-qanuni referendumun həyata keçirilməsində rol oynayan yüksək səviyyəli rusiyalı məmurları, həmçinin Putinin sevimli PR agentliyini hədəfə alıb.

Xarici işlər naziri Ceyms Kleverli bu gün Rusiyanın Ukraynanın dörd bölgəsində saxta referendumlar tətbiq etməsinə cavab olaraq 92 sanksiya elan etdiyini açıqlayıb. O, bu “referendum”un beynəlxalq hüququn, o cümlədən BMT Nizamnaməsini açıq şəkildə pozduğunu bildirib.

Sanksiya tətbiq olunan şəxslər arasında Xersonda qurulan hökumətinin başçısı, Rusiya Hərbi Dəniz Qüvvələrinin vitse-admiralı Sergey Yeliseyev, qondarma “Luqansk Xalq Respublikası”nın təhsil və elm naziri İvan Kusov, Zaporojyedə qondarma hökumətin başçısı təyin olunan Yevgeni Balitski, qondarma “Donetsk Xalq Respublikası” sədrinin müavini Evgeni Solntsevin də adları var.

Bundan əlavə, bu gün ümumi qlobal sərvətləri 6,3 milyard funt sterlinq dəyərində olduğu təxmin edilən daha dörd oliqarx da Rusiya hökumətini dəstəklədiyinə və ya ondan faydalandığına, strateji əhəmiyyət kəsb edən sektorlarda fəaliyyət göstərdiyinə görə sanksiyaya məruz qalıb.

“Rusiya daşınmaz əmlakının kralları” kimi tanınan Qod Nisanov və Zarah İliyev sanksiyalara məruz qalan şəxslər arasındadır. Onların ümumilikdə 2 milyard funt sterlinqlik dəyərində sərvətə sahibdirlər. Ural Mədən-Metallurgiya Şirkətinin prezidenti və təsisçisi İsgəndər Mahmudov, ARETI Beynəlxalq Qrupunun prezidenti və sahibi İqor Makarov da sanksiyaya məruz qalıb.

Bugünkü sanksiyalar paketində həmçinin Rusiya dövlətinə bağlı təşkilatların idarə heyətinin 55 üzvü də adı var. Putinin sevimli PR agentliyi kimi tanınan IMA Consulting də sanksiyaya məruz qalıb. “IMA” şirkətinin bu “referendum”ların ictimai kampaniyalarını idarə edən, müvəqqəti olaraq nəzarət edilən dörd ərazidə onların həyata keçirilməsini dəstəkləyən şirkət olduğu bildirilib.