“Reina” qətliamını törətməsi nəticəsində 39 nəfərin həyatına son qoyan özbək əsilli terrorçu Abdulkadir Maşaripov ölkəsində də axtarışda imiş. 

 

Musavat.com bu barədə Türkiyə mediasına istinadən xəbər verir. 

Türkiyə mətbuatının yaydığı məlumata görə, Maşaripov 6 il əvvəl Özbəkistandan Əfqanıstana gedərək terror təşkilatına üzv olduğu üçün adı Özbəkistanda axtarışda olanların siyahısına salınıbmış. 

Özbəkistan təhlükəsizlik orqanlarının yetkililərindən biri Türkiyə mediasına bildirib ki, kod adı Əbu Muhamməd Xorasani olan Maşaripov ölkənin şərqindəki Kokand şəhərində qeydiyyatda olub. Özbəkistan rəsmisi terrorçu haqqında məlumatların mübadiləsi məsələsində Türkiyə hüquq mühafizə orqanları ilə əməkdaşlıq etdiklərini də vurğulayıb. 

 

Qeyd edək ki, 1 yanvar 2017-ci il tarixində İstanbulun “Reina” adlı gecə klubunda qətliam həyata keçirən terrorçu Abdulkadır Maşaripov bir gün öncə İstanbulun ucqar rayonlarından olan Esenyurdda azyaşlı oğlu ilə birlikdə sağ olaraq ələ keçirilib.