Koronavirus pandemiyasına görə sərt karantin tədbirləri tətbiq olunarkən insanlar uzunmüddətli saxlanma imkanlarına görə ət konservlərinə üz tuturdular. Karantin tədbirləri yumşaldıqdan sonra isə ətin qiymətindəki bahalaşma və iqtisadi tənəzzül üzündən əhali ətdən daha ucuz olan konservləri almağa keçir. Burada mühüm rol oynayan faktor gəlirlərin azalmasıdır. Son aylarda dünyada yüz milyonlarla insanın gəlirlərində kəskin azalma baş verib – işlərini itirənlər xərclərinə qənaət etmək məcburiyyətində qalıblar. Bundan əlavə, agentlik bildirir ki, baş verən proseslər insanların qida çatışmazlığı və müharibə dövrlərini xatırlamasına səbəb olub.

Ət konservlərinin yaşı 80-dən yuxarıdır. Axır bir neçə onillikdə dərin tənəzzül keçirən bu sahədə çalışanların özləri də indiki bumu gözləmirdilər. Bu il Avropanın ən böyük ət emalçısı olan “Danish Crown Group” dünyanın 120 bazarında satılan “Tulip Pork Luncheon Meat” ət konservlərinin satışının 25 faiz artacağını gözləyir.

Braziliyanın “Marfrig Global Foods SA” mal əti nəhəngi Uruqvaydan ABŞ-a konserv ixrac edən müəssisəsinin satışında keçən ilə nicbətən 2 dəfə artım proqnozlaşdırır. Böyük Depressiya dövründə istehsalına başlanan, İkinci Dünya Müharibəsi dövründə böyük məşhurluq qazanan ət konservləri ondan bəri indiki qədər populyar olmayıb. Və bu populyarlığın getdikcə artması gözlənilir...