Maliyyə qurumları, qanunsuz immiqrantlar siyahısına düşən bütün müştərilər barədə məlumatı Daxili İşlər Nazirliyinə çatdırmalı və onların hesablarını bağlamalı və ya dondurmalı olacaq.

Belə ölçülərin görülməsi, 2016-ci ildə parlament tərəfindən qəbul edilmiş immiqrasiya haqqında qanunda nəzərdə tutulub.

Guardian qəzetinin məlumatına əsasən, banklarda qanunsuz miqrantlara dair məlumatların yoxlanılması üçün hər 3 aydan bir 70 milyon cari hesab nəzərdən keçiriləcək.

Britaniyada 2016-cı ildə qəbul olunmuş immiqrasiya haqqında qanunda immiqrantları ölkədən könüllü getməyə sövq etmək üçün bir sıra tədbirlər nəzərdə tutulub.

2014-cü ildən Britaniyada bank hesabı açma qaydaları sərtləşdirilib.

O vaxtdan etibarən banklar hesab açmaq istəyən müştərilərin miqrasiya statusunu yoxlamağa başlayıb.

Britaniya DİN-i banklara yalnız ölkədə qanunsuz qalan müştərilər barədə məlumatın veriləcəyini bildirib.

Belələrinin kateqoriyasına, o cümlədən, deportasiya olunmaq barədə qərardan apellyasiya vermək hüququnu itirmiş xaricilər də aid ediləcək, DİN rəhbəri Amber Rudd vurğulayıb.

Britaniya qanunvericiliyində, qeyri-leqal miqrantlara mənzil kirayəyə verən ev sahiblərinə və ya onları işə götürən şəxslərə qarşı sərt cəzalar nəzərdə tutulub.