O, Y.Əliyevanın ötən ilin son günlərində qətldə şübhəli qismində saxlandığını bildirib. E. Zahidov qeyd edib ki, nazirlik dekabrın sonunda Y.Əliyevanın saxlanılması haqqında məlumat yaymışdı. O və daha iki nəfər 2013-cü il mayın 15-də Lənkəran rayonunun Şürük kəndində yaşayan Zəngilan rayon sakini Fəxriyyə Hüseynovanın qətlinə görə saxlanılıblar.

“Yaqut Əliyeva Lənkəran Rayon Polis İdarəsi əməkdaşlarının həyata keçirdikləri əməliyyat tədbirləri ilə Fəxriyyə Hüseynovanın evinə qarət məqsədilə gəlmiş qonşuları ilə birgə saxlanılıb. Həmin şəxslərin F.Hüseynovanı itələyib elektrik sobasının üstünə yıxaraq, oradan 9100 manat pul, qızıl əşyalar aparmaları müəyyən edilib. Həyata keçirilmiş tədbirlərlə Elgün Həşimov, Y.Əliyeva və Xanım Həsənova saxlanılaraq polis idarəsinə gətiriliblər. Polisdə ifadələri alınıb və onlar cinayəti törətdiklərini etiraf ediblər”, - deyən DİN rəsmisinin sözlərinə görə, polisdə olarkən Y.Əliyeva ayaqyoluna getmək bəhanəsi ilə dindirildiyi otağı tərk edib. Daha sonra isə özünü idarə binasının 3-cü mərtəbəsindən aşağı atıb.

“Görünür, ifşa edildiklərini, cəza çəkməli olduğunu anladığından belə addım atıb. Yaqut Əliyevaya polisdə heç bir fiziki və psixoloji təzyiq olmayıb. Daxili İşlər Nazirliyi və prokurorluq bu iş üzrə araşdırmanı davam etdirəcək”, - deyə E.Zahidov bildirib.