Sonuncu gəlmə - italiyalı Canni De Byazi də ölkə futboluna xüsusi nəsə vermədən yola salınıb. Baş məşqçi postu müvəqqəti olaraq Arif Əsədova həvalə edilən seçmə martdakı oyunlara hazırlaşır. Müstəqillik dönəmindən bəri xərclənən 100 milyonlar fonunda orta səviyyəyə belə, çata bilməyən komandanın indiki vəziyyətdə olması, şübhəsiz, səriştəsiz idarəçiliyin nəticəsidir. Görünən budur ki, AFFA məmurlarının yanlış yollarla addımlamaq strategiyası inkişaf prosesini ləngidib, şəxsi mənafelərin güdazına gedən millinin dərdinə hələ də çarə tapılmayıb. Nə 2005-2015-ci illərdə Azərbaycan Respublikasında Futbolun İnkişafına dair Dövlət Proqramı uğurla yerinə yetirilib, nə də ondan sonrakı dönəmdə futbol qurumundakı əsas söz sahibləri qaranlıqdan işığa aparan cığırı tapa biliblər.

Bəlli, Azərbaycan futbolunu bataqlıqdan çıxarmaq mümkündür. Sadəcə, indikindən ən azı iki dəfə yaxşı milli formalaşdırmaq bacarıqsızlığını ört-basdır etmək naminə ictimaiyyətə qucaq-qucaq yalanlar sırıyanların görə bilmədiyi işdir. "Azərbaycanda futbol yoxdur", "bizdə oyunçu yetişmir", "futbol güləş deyil ki, bu idman növünü 10-15 ilə yeni səviyyəyə çatdırmaq mümkün ola" və sair kimi absurd fikirlərlərlə ictimaiyyəti hipnoz etmək cəhdləri isə yumşaq desək, gülüncdür.

Biz necə milli istəyirik?

Təbii, Azərbaycan seçməsinin qısa müddətdə Almaniya, İtaliya, İngiltərə səviyyəsinə qaldırmaq iddiası utopiyadan başqa bir şey deyil. Amma "idmanın şahı"na ayrılan böyük pullar qarşılığında elə mövcud infranstruktur və futbolçu resursları ilə də döyüşkən, sabit kollektiv formalaşdırmaq olar. Yığmanın komandaya bənzəməsi üçün yuxarıda da qeyd etdiyimiz kimi, işlək sistem tətbiq edilməli, AFFA prezidentindən qapıdakı mühafizəçiyə qədər hamı bir məqsəd uğrunda mübarizə aparmalıdır. Bəlli məsələdir ki, texniki heyətin işinə müdaxilələr olmamalı, futbol məsələləri bu işi ölkədə hamıdan yaxşı bilənlərə tapşırılmalıdır. Bəli, biz hər şeydən öncə vəzifə davasına çıxan qeyri-futbol adamlarının zərərsizləşdirilməsini, bu idman növünün kimlərinsə "kreslo"da daha çox qalmaq hədəfinə qurban verilməməsini arzulayırıq. İstəyimiz də reallıqla düz mütənasibdir: öz dəsti-xətti, milli ruhu olan, yersiz müdaxilələrdən birdəfəlik qurtulmuş komanda...

Qurban Qurbanov milliyə!

Ortada "Qarabağ" nümunəsi var. Mərhələli inkişafın, daxili birliyin, rəhbərliyin məşqçilər korpusunun işinə qarışmamasının və çox istedadlı mütəxəssisin - Qurban Qurbanovun məharətinin nəticəsi. Ağdam təmsilçisinin hansı çətinliklərdən keçdiyi, doğru yolu necə tapdığı, Avropa səhnəsinə necə çıxdığı, illərdir gördüyümüz sabitliyi necə qoruduğu haqda çox şey danışmaq olar. Doğrudur, klub futbolu ilə milli arasında müəyyən fərqlər var. Lakin ölkə futbolunun aynasının - yığmanın çiçəklənməsi üçün bacarıqlı mütəxəssis və düzgün olduğu şübhə doğurmayan sistem varsa, əlavə arqumentlər axtarmaq yersizdir. Apreldə keçiriləcək seçkilərdən sonra AFFA prezidenti postunu kimin tutacağından asılı olmayaraq, Qurbanov amilindən faydalanmaq prioritet hədəf seçilməlidir. Reallıq budur ki, sözügedən şəxs ölkənin bir nömrəli futbol mütəxəssisidir və onun təcrübəsindən yararlanmamaq olmaz. 

Hə, Qurban bəy bir neçə il öncə də milliyə baş məşqçi təyin edilmiş, düzgün saydığı inkişaf modelinin tətbiqinə başlamışdı. Sonradan özünün də etiraf etdiyi kimi, AFFA-da birliyin olmaması hər şeyin yarımçıq qalmasını şərtləndirdi... Gözlədiyi dəstəyi almayan azərbaycanlının gedişindən sonra yaxşıya doğru heç nə dəyişmədi. Yenə təsadüfi uğur işartıları, uzun sürən qələbəsizlik seriyaları, hər matçda başqa təsir bağışlayan milli izlədik. 

Qurbanova yalnız əsas yığma tapşırılmamalı, bütün yaş qrupları üzrə millilər bu adamın nəzarətinə verilməlidir. Yeni AFFA prezidenti və digər başbilənlər isə "Qarabağ" rəhbərliyinin yolu ilə getməli, özlərinə aid olmayan futbol məsələlərinə müdaxilə etməməlidirlər. Qurban bəy "Qarabağ"dakı işini davam etdirmək şərti ilə milli futbola çox şey verə və yığmalardakı əsas söz sahibi qismində Azəarbaycan futbolunu işıqlı  gələcəyə daşıya bilər. Gerçəkliklə hesablaşmaq, təkəbbürdən əl çəkmək, Qurbanov simasının ətrafında cəmləşmək ən ciddi perspektiv vəd edən yeganə variantdır. (Fanat.Az)