AzFakt.com xəbər verir ki, iqtisadiyyat naziri Mikayıl Cabbarovun müvafiq əmri ilə Mahir Hümbətov institutun direktoru, nazirin sabiq müşaviri Şirzad Abdullayev isə direktor müavini təyin olunub.

Nazirliyin strateji beyin mərkəzi funksiyasını oynayan və Mikayıl Cabbarovun xüsusi önəm verdiyi institutun yeni direktoru kimdir? Nə üçün uzun illər bu sahədə çalışan Şirzad Abdullayev müavin, mətbuata adı o qədər də tanış olmayan Mahir Hümbətov direktor təyin olunub? 

AzFakt.com-a danışan Nazirliyin İctimaiyyətlə əlaqələr şöbəsinin müdiri Abbas Əliyev bildirib ki, Mahir Hümbətov bu posta kifayət qədər uyğun kadrdır: “Bizim mətbuatın bir şəxsi tanımaması onun tanınmadığı və ya yaxşı kadr olmadığı anlamına gəlmir. Yaxın günlərdə tərcümeyi-halı saytda yayınlanacaq. Onunla tanış olun, daha sonra bu mövzuya qayıdaq. Mahir Hümbətov bu sahədə tanınmış şəxsdir”. 

AzFakt.com açıq resurslardan bu təyinata qədərki Mahir Hümbətovu araşdırıb. İctimaiyyətə açıq profillərinə əsasən Mahir Hümbətov, dünyada tanınmış bir sıra beynəlxalq təşkilarlarda müxtəlif sahələrdə işçi qruplarının üzvü olub və ya ekspert qismində çıxış edib. Xaricdə və Azərbaycanda çap edilmiş 7 kitabın müəllifidir, 7 dil bilir. 

Kitablarındakı tərcümeyi-halında isə bunlar yazılır: “Həm Qərb və həm də Şərq təhsilli Mahir Hümbətov iqtisadiyyatla yanaşı maliyyə, təhlükəsizlik, xarici siyasət, daxili siyasət, regional və beynəlxalq məsələlər və başqa sahələrdə dərin bilik və təcrübəyə malikdir”.