Bu barədə Nazirlər Kabinetinin 2019-cu il üzrə hesabatında bildirilib.

2020-ci ilin birinci rübündə məcburi köçkünlərin həmin qəsəbələrə köçürülməsinə başlanılacaq.

Sənəddə qeyd olunub ki, məcburi köçkünlərin mənzil-məişət problemlərinin həlli məqsədilə Heydər Əliyev Fondunun dəstəyi ilə Bakı şəhəri, Qaradağ rayonunda “Qobu Park-3” yaşayış kompleksində 1352 və “Qobu Park-4” yaşayış kompleksində 1300 mənzilin inşası nəzərdə tutulub.

Məcburi Köçkünlərin Sosial İnkişaf Fondunun sifarişi və Dövlət Neft Fondunun vəsaiti hesabına Abşeron rayonunda (Sumqayıt d/y st-nın yanı) 1890, Samux rayonunda 200, Bakı şəhəri, Binəqədi rayonu, Xocasən qəsəbəsində 800 mənzilli yaşayış komplekslərinin inşa olunacaq.

Hökumətin hesabatında vurğulanıb ki, Azərbaycanın dövlət büdcəsində dövlət investisiya xərcləri üzrə ayrılan vəsait hesabına Bakı şəhəri, Suraxanı rayonu, Hövsan qəsəbəsində 270, Abşeron rayonunda (Sumqayıt d/y st-nın yanı) 1152, Abşeron rayonun Ramana qəsəbəsində 1512, Bakı şəhəri Sabunçu rayonu, Maştağa qəsəbəsində 576 mənzilli yaşayış komplekslərinin və Bakı şəhəri Qaradağ rayonunda 180 mənzilli “Ümid-3” qəsəbəsinin inşası nəzərdə tutulub.