Bakı-Quba-Rostov yolunu buna misal çəkmək olar. Ziya Məmmədov bu beton yola 30 il zəmanət vermişdi. Lakin bir neçə ildən sonra həmin yol acınacaqlı vəziyyətə düşdü. Nəhayət, Ziya Məmmədov Nəqliyyat Nazirliyinin ləğv edilməsi nəticəsində nazir postunu itirdi. Nəqliyyat Nazirliyinin tabeliyində olan “Azəryolservis” müstəqil quruma çevrildi və Saleh Məmmədov oranın rəhbərliyinə gətirildi. Cəmiyyətdə yolların yenidən qurulacağına, ümumiyyətlə yol təsərrüfatında ciddi irəliləyişlərin olacağına ümid yarandı.

Son illər aparılan müşahidələr göstərir ki, Saleh Məmmədov ona olan ümidləri doğrultmağa çalışır. “Azəryolservis”in əvvəlcə dəfələrlə təmir olunmuş, lakin qısa müddətdən sonra dağılan yolların bərpasına başladı. Xüsusilə Bakı-Quba-Rostov yoluna diqqət ayrıldı. Daha bərbad vəziyyətdə olan bu yolun Bakı-Sumqayıt hissəsində bərpa işləri qısa müddətdə başa çatdırıldı. 

Daha sonra kənd yollarının yenidənqurulmasına başlandı. Məlumat üçün deyək ki, son iki il ərzində prezident İlham Əliyev tərəfindən kəndlərarası avtomobil yollarının tikintisi üçün 685 min əhalinin yaşadığı, 423 yaşayış məntəqəsini birləşdirən 962 kilometr uzunluğunda yolun ikintisi üçün 32 şəhər və rayon üzrə 41 sərəncam imzalanıb. Hazırda bu istiqamətdə ciddi işlər aparılır.

Hazırda “Azəryolservis” Şabran, Şəmkir, Tovuz, Qəbələ və Şamaxıda daxili yolların yenidən qurulması ilə məşğuldur. Bundan başqa, uzun illərdi bərbad vəziyyətdə olan və vətəndaşların ciddi narazılığına səbəb Xırdalan şəhərinin mərkəzi yollarının da yenidən qurulmasına başlanılıb.

Ümümiyyətlə, ölkə başçısının imzaladığı 81 Sərəncama əsasən, 48 rayon və şəhər ərazisində 3,2 milyon nəfər əhalinin yaşadığı 761 yaşayış məntəqəsini birləşdirən, uzunluğu 1816 kilometr olan avtomobil yollarının tikintisi və yenidən qurulması işlərinə başlanılıb.

Bu günə kimi, cəmiyyət tərəfindən 2 milyon nəfər əhali yaşayan, 370 yaşayış məntəqəsini birləşdirən uzunluğu 1030 kilometr olan 56 layihənin icrası uğurla başa çatdırılıb.

Müşahidələr göstərir ki, ölkə başçısının da ciddi nəzarətində olan bu sahədəki irəliləyişlər yollarla bağlı hakimiyyətə olan tənqidlərin azalmasına səbəb olub.