"La Gazzetta dello Sport": Pol Poqbanın zədələri "Yuventus" rəhbərliyini hövsələdən çıxarıb. Fransa millisinin üzvünün məşqdə qapıya zərbələr vurulan zaman əzələsi dartınıb. Əvvəlcə Poqbanın 2-3 həftəyə sağalacağı deyilsə də, 1 aya bərpa olunacağı bildirilib. Bütün bunlardan narazı qalan "Goca sinyora" yarımmüdafiəçini transferə çıxarmağı planlaşdırır. 

İnsayder Fabritsio Romano: "Barselona" yarımmüdafiəçisi Usman Dembele ilə müqaviləni yeniləməyi planlaşdırır. Ancaq müqavilə şərtlərində bəzi dəyişikliklər ola bilər. Dembelenin hazırki sözləşməsinin müddəti 2024-cü ilin yayında başa çatır. Onun buraxılış qiyməti 100 milyon avrodur. Ancaq Kataloniya təmsilçisi yeni sözləşmədə bu bəndi dəyişdirərək qiyməti 50 milyon avroya salmaq fikrindədir. Beləliklə, yeni sözləşmə imzalanarsa, yayda Dembeleni transfer etmək istəyən klub 100 milyon yox, 50 milyon avro ödəyəcək. 

"Daily Mirror": "Liverpul"un futbolçusu Roberto Firmino başqa klublarla danışıqlar aparmayacaq. O, yeni klubla bağlı qərarını mövsümün sonunda açıqlayacaq. Braziliyalı hücumçunun "Liverpul"la sözləşməsi yayda başa çatacaq.