AZƏRTAC-ın məlumatına görə, İlham Əliyev deyib ki, Azərbaycan həm işğal dövründə, həm İkinci Qarabağ müharibəsi dövründə Albaniya rəsmilərinin ölkənin ərazi bütövlüyünə göstərdiyi dəstəyi çox yüksək qiymətləndirir: “Biz İkinci Qarabağ müharibəsinin nəticəsi olaraq öz əzəli torpaqlarımızı işğalçılardan azad etdik, beynəlxalq hüququ, ədaləti bərpa etdik. BMT Təhlükəsizlik Şurasının 1993-cü ildə qəbul olunmuş qətnamələri 27 il ərzində icra edilmirdi. Ermənistan bu qətnamələrin icrasına maraq göstərmirdi, məhəl qoymurdu, beynəlxalq ictimaiyyət, beynəlxalq birlik isə buna göz yumurdu və Ermənistana hər hansı bir sanksiya tətbiq edilməmişdi. Baxmayaraq ki, Azərbaycan dəfələrlə məsələ qaldırmışdı ki, Ermənistana qarşı sanksiyalar tətbiq edilsin, Ermənistan cəzalandırılsın. Çünki Azərbaycan ərazisinin 20 faizini işğal etmək böyük cinayətdir və işğal edilmiş torpaqlarda qanunsuz məskunlaşma aparmaq hərbi cinayətdir. Orada törədilmiş dağıntılar faktiki olaraq o torpaqları tamamilə cansız edib.

Biz bu məsələni təkbaşına həll etdik, ədaləti bərpa etdik və azad edilmiş torpaqlarda indi Azərbaycan bayrağı dalğalanır. Biz bu torpaqlara qayıtmışıq və bu torpaqlara həyat qayıdır. Xalqımız, dövlətimiz üçün əsas olan məsələdə ölkənizin bizə dəstək verməsi bizim üçün çox önəmlidir”.