May ayından etibarən Avropa Səyahət Məlumatı və Avtorizasiya Sisteminin (ETIAS) bir hissəsi olan Giriş və Çıxış Sistemi (EES) qüvvəyə minəcək.

Musavat.com xarici mediaya istinadən xəbər verir ki, yeni sistem Aİ hüdudlarından kənarda yaşayan şəxslərin Şengen zonasındakı ölkəyə daxil olmamışdan əvvəl viza üçün müraciət və ödəniş etmələrini tələb edəcək.

Şengen zonasına hər giriş üçün əlavə 7 avro ödəniləcək.

Yeni sistemlə pasport məlumatları, barmaq izi, üz təsvirləri ilə birlikdə biometrik məlumatların qeyd edilməsi lazım olacaq. Bu, Aİ-də 90 gündən artıq qalan şəxslərin müəyyən edilməsini asanlaşdıracaq.

Məlumatda bildirilib ki, yeniliklər  Aİ vətəndaşı olmayan, lakin rəsmi olaraq üzv dövlətdə yaşayanlara şamil olunmayacaq.

Fransa hava limanlarında sərnişinlərin biometrik məlumatlarını və şəxsi məlumatlarını əvvəlcədən qeydiyyatdan keçirə biləcək özünəxidmət köşkləri quracaq. Bu məlumatlar daha sonra gömrük işçisi tərəfindən yoxlanılacaq.

Almaniya və Avstriyanın hakimiyyət orqanları da oxşar sistemi hava limanlarında quraşdıracaqlarını təsdiqləyiblər.

İtaliya bütün əsas hava limanlarında avtomatik qapıların sayını artıracağını və 600-ə yaxın özünəxidmət köşkü quraşdıracağını açıqlayıb.

Norveç sərhədçilərin idarə etdiyi “avtomatik kameraları” sınaqdan keçirəcək.