APA xəbər verir ki, bu barədə Ukrayna müdafiə naziri Aleksey Reznikov “BFM TV”-yə müsahibəsində deyib.

Nazir qeyd edib ki, ruslar simvolizmə önəm verir və bu səbəbdən də Rusiya keçən il 24 fevralda başlayan genişmiqyaslı işğalın ildönümü ilə eyni gündə yeni hücum təyin edə bilər.

Reznikov vurğulayıb ki, Ukrayna heç zaman Rusiya ordusunun imkanlarını aşağı qiymətləndirmir: “Rəsmi olaraq 300 min nəfərlik səfərbərlik elan edilib, lakin sərhədə toplanmış qoşunları görəndə, bizim hesablamalarımızla sayın daha çox olması üzə çıxır”.

O həmçinin hesab edir ki, rus qoşunları iki istiqamətdə - Donbass və cənub istiqamətində hücuma cəhd edə bilər.

Nazir bildirib ki, Ukrayna tez bir zamanda hücum təyyarələri əldə etməli və müttəfiq ölkələr tərəfindən ukraynalı pilotlara təlimlər keçirilməlidir.

Xatırladaq ki, bir müddət əvvəl Ukrayna Milli Təhlükəsizlik və Müdafiə Şurasının katibi Aleksey Danilov Rusiya Silahlı Qüvvələrinin genişmiqyaslı hücumlara hazırlaşması barədə xəbərdarlıq etmişdi.